وزیر دفاع خواجہ محمد آصف نے کہا ہے کہ پاکستان کی جانب سے کسی بھی جنگ کا آغاز نہیں کیا جائے گا، لیکن اگر بھارت نے جنگ مسلط کی تو پاکستان بھرپور اور فیصلہ کن جواب دے گا۔ ان کا کہنا تھا کہ بھارت جتنی طاقت استعمال کرے گا، پاکستان اس سے زیادہ طاقت کے ساتھ جواب دینے کی صلاحیت رکھتا ہے۔
یہ بات خواجہ آصف نے پارلیمنٹ ہاؤس کے باہر میڈیا سے گفتگو کرتے ہوئے کہی۔ ان کا کہنا تھا کہ موجودہ کشیدہ صورتحال پر دوست اور ہمسایہ ممالک کے علاوہ خطے کی بڑی طاقتیں بھی سفارتی سطح پر ثالثی کی کوششیں کر رہی ہیں تاکہ کشیدگی کم ہو اور امن کو موقع ملے۔
وزیر دفاع نے کہا، "اللہ کرے ان ممالک کی کوششوں سے بھارت کو کچھ عقل آئے۔ لیکن اگر جنگ ہم پر مسلط کی گئی، تو کسی کو کوئی شک نہ رہے، ہم جواب ضرور دیں گے۔" ان کا کہنا تھا کہ پاکستان بھارت کے ہر عمل کا اسی سطح پر ردعمل دے گا۔
خواجہ آصف نے متنبہ کیا کہ جیسے جیسے وقت گزر رہا ہے، بھارتی جارحیت کے خطرات بڑھتے جا رہے ہیں۔ تاہم، پاکستان دفاع کے لیے مکمل طور پر تیار ہے۔ انہوں نے کہا، "ہم امن کے خواہاں ہیں، لیکن اپنی خودمختاری اور سلامتی پر کوئی سمجھوتہ نہیں کریں گے۔"
وزیر دفاع نے یہ بھی کہا کہ وزیراعظم شہباز شریف نے پہلگام میں بھارتی سیاحوں پر ہونے والے حملے کی بین الاقوامی سطح پر تحقیقات کا مطالبہ کیا ہے، لیکن بھارت نے اس مطالبے کا کوئی جواب نہیں دیا۔ ان کے مطابق، "بھارت کا خاموش رہنا اس بات کا ثبوت ہے کہ دال میں کچھ کالا ہے۔"
Last edited by a moderator:
