اسرائیلی حکومت نے سیکیورٹی خدشات کی بنا پر دبئی کیلئے اپنی پروازیں منسوخ کرنے کا اشارہ دیدیا ہے۔
بین الاقوامی خبررساں ادارے رائٹرز کی رپورٹ کے مطابق اسرائیل نے دبئی میں سیکیورٹی انتظامات پر عدم اطمینان کا اظہار کرتے ہوئے اپنی ایئرلائنز کیلئے پروازیں منسوخ کرنے کا امکان ظاہر کیا ہے۔
رپورٹس کے مطابق اسرائیل کی جانب سے متحدہ عرب امارات کے دارالحکومت ابو ظبی کیلئے پروازوں کو معمول کے مطابق جاری رکھنے کا فیصلہ کیا گیا ہے تاہم ان پروازوں کا روٹ تبدیل کرنے پر غور کیا جارہا ہے۔
اسرائیل سے دبئی کیلئے تین ایئر لائنز آپریٹ کرتی ہیں جن میں اسراایئر، آرکیا اور ال عال شامل ہیں، ان ایئر لائنز کیلئے دبئی کے موجودہ سیکیورٹی انتظامات کا ضابطہ اخلاق منگل کے روز ختم ہورہا ہے جس کا مطلب ہے کہ ضابطہ اخلاق میں توسیع یا منسوخی کا فیصلہ کرنے کیلئے صرف چند گھنٹوں کاوقت باقی ہے۔
تاہم مدت ختم ہونے سے پہلے ہی اسرائیلی حکومت کی جانب سے پروازوں کی منسوخی سے متعلق اشارہ ملنے کے حوالے سے ماہرین کا کہنا ہے کہ ضابطہ اخلاق میں توسیع نہیں کی جائے گی اور بدھ کو باضابطہ طور پر پروازیں بند کرنے کا اعلان کردیا جائے گا۔
ذرائع کا کہنا ہے کہ اس دوران اگر دبئی اور اسرائیلی حکام سیکیورٹی معاملات پر اتفاق پیدا کرلیتے ہیں تو ضابطہ اخلاق میں توسیع بھی ممکن ہے جس کے بعد پروازیں معمول کے مطابق چلیں گی دوسری صورت میں اگر اسرائیل نے دبئی کیلئے اپنی پروازیں بند کردیں تو امارات کی ایئر لائن فلائی دبئی کو فائدہ بھی پہنچے گا کیونکہ یہ ایئر لائن اسرائیلی دارالحکومت تل ابیب سے براہ راست دبئی کیلئےآپریٹ کرتی ہے۔
