اسرائیل کی خفیہ ایجنسی کی طرف سے اسرائیل کے فوجی اڈوں ، توانائی انفراسٹرکچر ودیگر معلومات جمع کر کے ایران کی انٹیلی جنس ایجنسیوں کو دینے والے ایک جاسوسی نیٹ ورک کو پکڑنے کا دعویٰ کیا گیا ہے۔
بین الاقوامی خبررساںادارے کی رپورٹ کے مطابق اسرائیل کی خفیہ ایجنسی شن بیت اور پولیس کی طرف سے جاری بیان میں کہا گیا ہے کہ اسرائیل کی خفیہ معلومات ایرانی انٹیلی جنس ایجنسیوں کو فراہم کرنے والے ایک بڑے جاسوسی نیٹ کو ورک 7 افراد کو گرفتار کر لیا گیا ہے۔
اسرائیلی سکیورٹی فورسز کے بیان میں بتایا گیا ہے کہ تحقیقات کے بعد شمالی اسرائیل اور ساحلی شہر حیفا سے 7 افراد کو گرفتار کیا گیا ہے جو ایران کی انٹیلی جنس ایجنسیوں کو فوجی اڈوں، توانائی انفراسٹرکچر اور اسرائیلی بندرگاہوں سے متعلق خفیہ معلومات کر رہے تھے۔ پولیس ترجمان کے مطابق یہ اسرائیل کے خلاف ہونے والی اب تک کی جانے والی سب سے سنگین نوعیت کی جاسوسی کارروائی ہے۔
اسرائیلی خفیہ ایجنسی شن بیت کے سینئر عہدیدار نے بتایا کہ اس نیٹ ورک کی سرگرمیوں کے باعث اسرائیلی ریاست کے تحفظ کو نقصان اٹھانا پڑا ہے۔ اسرائیل سے گرفتار کیے جانے والے یہ تمام افراد اسرائیلی شہریت کے حامل یہودی ہیں جن میں سے 2 افراد کی عمر 18 سال سے کم عمر بتائی گئی ہے جبکہ ان میں اسرائیلی فوج کا ایک سابق اہلکار بھی شامل ہے۔
میڈیا رپورٹ کے مطابق ایرانی وزارت خارجہ کی طرف سے اس معاملے پر فوری طور پر کسی ردعمل کا اظہار نہیں کیا گیا جبکہ بتایا گیا ہے کہ ملزمان کو ایرانی انٹیلی جنس سروس کے 2 ایجنٹوں کی طرف سے خفیہ معلومات جمع کرنے کے احکامات دیئے گئے تھے۔ ملزمان کے اہداف میں اسرائیل کا شمالی قصبہ حدیرہ کا پاور پلانٹ، بحری وفضائی فوجی اڈے، مختلف بندرگاہیں اور آئرن ڈوم فضائی دفاعی نظام شامل تھا۔
میڈیا رپورٹ کے مطابق گرفتار کیے گئے افراد پر اسرائیلی فوج کے 2 فوجی اڈوں رماوت ڈیوڈ اور نیواتم بیس کی جاسوسی کرنے کا الزام عائد کیا گیا ہے جو حزب اللہ اور ایرانی حملوں میں نشانہ بنائے گئے تھے۔ اسرائیلی فوجی ادوں کی جاسوسی کرنے کے بعد ملزموں نے لاکھوں ڈالر وصول کیے جن میں سے کچھ رقم کرپٹو کرنسی کے ذریعے منتقل کی گئی تھی۔
اسرائیلی خفیہ ایجنسی کے عہدیدار نے بتایا کہ تحقیقات میں ایرانی ایجنٹوں کو فراہم کیا گیا مواد بڑی تعداد میں برآمد ہوا جبکہ پولیس ترجمان نے بتایا کہ ملزموں نے ایران کیلئے جاسوسی مالی فوائد حاصل کرنے کیلئے کی۔ واضح رہے کہ اسرائیلی سکیورٹی فورسز نے گزشتہ ماہ بھی ایک شہری کو گرفتار کیا تھا جس پر ایران کی طرف سے اسرائیلی وزیراعظم ودیگر اہم شخصیات کے قتل کی سازش میں ملوث ہونے کا شبہ ظاہر کیا گیا تھا۔
- Featured Thumbs
- https://www.siasat.pk/data/files/s3/13iranaisiraaspspnettwie.png
