پنجاب اور خیبرپختونخوا کی اسمبلیاں تحلیل ہونے کے بعد بھی حکومت انتخابات کی تاریخ نہیں دے رہی: سابق وزیراعلیٰ پنجاب
امریکی ڈیمو کریٹ پارٹی کے سینئر رہنماء طاہر جاوید نے سابق وزیراعلیٰ پنجاب چودھری پرویز الٰہی سے ملاقات کی ہے جس میں اوورسیز پاکستانیوں کو درپیش مسائل حل کرنے بارے تبادلہ خیال کیا گیا جبکہ دونوں رہنمائوں کے مابین پاکستان اور امریکہ کے دوطرفہ تعلقات کو فروغ دینے کے حوالے سے گفتگو کی گئی۔
ملاقات کے دوران طاہر جاوید نے کہا کہ سابق آرمی چیف جنرل قمر جاوید باجوہ اہم مسئلوں کے موقع پر خاص طور پر ہمیں مدعو کرتے تھے اور مشاورت کیا کرتے تھے، ان کا کہنا تھا کہ پاکستان میں امریکہ کسی غیرآئینی کام میں اپنا اثرورسوخ استعمال نہیں کرے گا۔
چودھری پرویز الٰہی کا کہنا تھا کہ امریکہ اور پاکستان کے درمیان باہمی تجارت کے علاوہ رابطوں کو مزید موثر کرنے کی ضرورت ہے۔ پاکستان کو اس وقت اپنی تاریخ کے بڑے معاشی بحران کا کا سامنا ہے، مشکل کے اس موقع پر ہمیں دوست ممالک کے ساتھ تجارت سمیت دیگر معاملوں پر روابط بڑھانے ہوں گے۔
دریں اثنا سابق وزیراعلیٰ پنجاب کا کہنا تھا کہ ملک میں جاری معاشی بحران پر قابو پانے کے لیے فوری طور پر انتخابات کروانے چاہئیں جبکہ موجودہ حکومت انتخابات سے راہ فرار اختیار کرنا چاہتی ہے کیونکہ پنجاب اور خیبرپختونخوا کی اسمبلیاں تحلیل ہونے کے بعد بھی حکومت انتخابات کی تاریخ نہیں دے رہی۔
انہوں نے مزید کہا کہ وفاقی حکومت کی طرف انتخابات کے انعقاد پر توجہ دینے کے بجائے مقدمات، گرفتاریاں اور انتقامی کارروائیاںکا سلسلہ شروع کر دیا گیا ہے، حکومت نے اپنی ساری توجہ اپوزیشن کے خلاف منفی ہتھکنڈے استعمال کرنے پر کر رکھی ہے۔ اوورسیز پاکستانی قیمتی اثاثہ ہیں، اپنے دور اقتدار میں ان کے مسائل حل کرنے کی بھرپور کوششیں کیں، سفارتی سطح پر بھی اقدامات ہونے چاہئیں۔
- Featured Thumbs
- https://www.siasat.pk/data/files/s3/17parvezelahiiiiikrr.jpg
