روپے کے مقابلے میں ڈالر کی قدر میں آج پھر تیزی دیکھنے میں آئی اور ڈالر کی قیمت میں ایک روپیہ 58 پیسے کا اضافہ ہوگیا
اسٹیٹ بنک کی جانب سے جاری کردہ اعدادوشمار کے مطابق آج روپے کے مقابلے میں ڈالر کی قیمت میں ایک روپیہ 58 پیسے اضافہ دیکھنے میں آیا جس کے بعد ڈالر کی قیمت 200روپے 77 پیسے سے بڑھ کر 202 روپے 35 پیسے ہوگئی۔
آج پاکستان سٹاک مارکیٹ میں تیزی دیکھنے میں آئی اور کاروباری دن کے اختتام پر 278پوائنٹس کا اضافہ ہوا۔
سٹاک مارکیٹ میں تیزی کے باعث 100 انڈیکس کی 42 ہزار کی نفسیاتی حد دوبارہ بحال ہوگئی اور کاروباری دن کے اختتام پر 100 انڈیکس 42014کی سطح پر پہنچ گیا
دوسری جانب ملک میں گزشتہ ہفتے کے دوران زرمبادلہ کے سرکاری ذخائر میں مزید 49 کروڑ 70 لاکھ ڈالرز کی کمی واقع ہوگئی ہے۔
ایکسپریس نیوز کے مطابق ذخائر میں مزید کمی کے بعد زرمبادلہ کے سرکاری ذخائر 9 ارب 22 کروڑ 62 لاکھ ڈالرز کی سطح پر آگئے جبکہ زرمبادلہ کے مجموعی ذخائر میں 59 کروڑ 49 لاکھ ڈالرز کمی ہوئی ہے۔
زرمبادلہ کے مجموعی ذخائر کی مالیت 15 ارب 17 کروڑ 65 لاکھ ڈالرز کی سطح پر آگئی۔ کمرشل بینکوں کے ذخائر ایک ہفتہ میں 9 کروڑ 82 لاکھ ڈالرز کمی سے 5 ارب 95 کروڑ ڈالرز کی سطح پر آگئے۔