پنجاب کے شہر بہاولنگر میں پولیس اسٹیشن کے اندر خاتون پر تشدد کے معاملے پر پنجاب پولیس کے ترجمان نے وضاحتی بیان جاری کردیا ہے۔
تفصیلات کے مطابق سوشل میڈیا پر ایک ویڈیو وائرل ہے جس میں ایک خاتون کو بدترین تشدد کا نشانہ بنایا جارہا تھا، اس موقع پر چند دیگر افراداور پولیس اہلکار بھی موجود تھے۔
تفصیلات کے مطابق ایک لیڈی ڈاکٹر کو تین افراد نے ایس ایچ او ہارون آباد (بہاولنگر) کے دفتر میں بدترین تشدد کا نشانہ بنایا، کوئی بھی اس سول سرونٹ کی نہیں سن رہا۔
پنجاب پولیس کے ترجمان نے اس واقعہ پر ردعمل دیتے ہوئے کہا کہ یہ معاملہ خاتون لیڈی ڈاکٹر اور انکے شوہر کےمابین لڑائی جھگڑے کا معاملہ تھا جس پردونوں فریقین کو پولیس نے بات چیت کے لیے بلایا۔شوہرخود نہ آیا تاہم شوہر کے کزن عدیل نے تلخ کلامی پرلیڈی ڈاکٹر پر تشدد شروع کردیا۔
انہوں نے مزید کہا کہ پولیس نےعدیل پر مقدمہ درج کرکے اسے فوری گرفتارکرلیا،جو جیل جا چکا ہے۔
ترجمان پنجاب پولیس نے مزید کہا کہ پولیس اسٹیشن میں ایس ایچ او کے سامنے یہ واقعہ پیش ہونے پر بہاولنگر پولیس نے ایس ایچ او کو عہدے سے ہٹا دیا ہے تاہم مزید کاروائی کے لیے انکوائری کی جارہی ہے۔