سینٹرل کنٹریکٹ پر اب تک دستخط نہ ہوسکے,جس کے باعث قومی کرکٹرز کو واجبات کی ادائیگی نہیں ہو سکی ، کیٹیگریز پر بدستور بعض کرکٹرز ناخوش ہیں۔
پاکستان کرکٹ بورڈ نے نئے سینٹرل کنٹریکٹ میں کھلاڑیوں کے معاوضوں میں بڑا اضافہ کر دیا تھا،جس کے مطابق اے کیٹیگری میں موجود بابراعظم، محمد رضوان اور شاہین شاہ آفریدی کو ماہانہ 60 لاکھ 30 ہزار روپے ، بی کیٹیگری کو ماہانہ 41 لاکھ 47 ہزار 500 ، سی کیٹیگری کو ماہانہ 17 لاکھ 65 ہزار اور ڈی کیٹیگری کوماہانہ 11 لاکھ 32 ہزار500 روپے دیئے جائیں گے۔
ایک کھلاڑی نے تصدیق کی کہ اب تک بورڈ نے کوئی ادائیگی نہیں کی، انھوں نے یہ بھی انکشاف کیا کہ کنٹریکٹ پر تو دستخط ہی نہیں ہوئے، ورلڈکپ اسکواڈ میں شامل بعض کرکٹرز نے ڈی کیٹیگری میں شمولیت پر اعتراض اٹھایا، چند دیگر بھی اپنی کیٹیگریز سے خوش نہیں۔
ذرائع کے مطابق کنٹریکٹ کے معاملے میں خود تمام کھلاڑی بھی ایک پیج پر نہیں رہے، بعض کھلاڑیوں کا خیال ہے کہ بابر اعظم و دیگر نے اپنے لیے مراعات حاصل کر لیں دیگر کا نہیں سوچا۔
پی سی بی کے عہدیدار نے کہا کہ معاہدوں پر دستخط ہوں تو ادائیگی کیسے ممکن ہو گی؟ ہم نے کھلاڑیوں سے کہا تھا کہ ای میل کے ذریعے اپنی رضامندی سے آگاہ کر دیں مگر کسی نے جواب نہیں دیا، اب ایک آفیشل کو بھارت بھیجا ہے تاکہ وہ دستخط کرا کے لائے تو ادائیگیاں کی جائیں۔
بورڈ نے چند روز قبل سرفراز احمد کی کیٹیگری تبدیل کرتے ہوئے بعض نئے کھلاڑیوں کو بھی کنٹریکٹ کی فہرست کا حصہ بنایا تھا۔
- Featured Thumbs
- https://www.siasat.pk/data/files/s3/1pakscnenpbncc.png
