پاکستان اور بھارت کے درمیان جنگ بندی کے فیصلے کو شوبز کی اہم شخصیات نے خوش آئند قرار دیتے ہوئے اس پر اطمینان کا اظہار کیا ہے اور واضح کیا ہے کہ وطن کی حفاظت کے لیے کسی قربانی سے گریز نہیں کیا جائے گا۔
10 مئی کی سہ پہر امریکی صدر ڈونلڈ ٹرمپ کی ثالثی کے بعد پاکستان اور بھارت نے فوری اور مکمل جنگ بندی کا اعلان کیا تھا، جس کے بعد دونوں ممالک میں امن کی امید پیدا ہوئی۔ امریکی صدر نے اپنی ایکس پوسٹ کے ذریعے اس فیصلے کا اعلان کیا، جس میں دونوں ممالک کی جانب سے جنگ بندی پر رضامندی ظاہر کی گئی تھی۔
پاکستانی شوبز شخصیات نے جنگ بندی کے اس فیصلے کا خیرمقدم کرتے ہوئے بھارت کو واضح پیغام دیا کہ آئندہ کوئی جارحیت کرنے کی کوشش نہ کرے۔
اداکارہ سجل علی نے سیز فائر کو مشکل کی گھڑی میں امید کی کرن قرار دیتے ہوئے کہا کہ ہر انسان قدرتی طور پر اپنے ملک کی حمایت کرتا ہے، لیکن جنگ کسی مسئلے کا حل نہیں، سیز فائر امید کی ایک نئی روشنی ہے۔
اداکار عثمان خالد بٹ نے بھی سیز فائر کا خیرمقدم کرتے ہوئے اس بات پر زور دیا کہ ابھی تک پہلگام واقعے کے حملہ آوروں کا پتہ لگانا باقی ہے اور پاکستان پر لگائے گئے الزامات بے بنیاد ہیں۔
ایمن خان نے بھی پاکستان اور بھارت کے درمیان جنگ بندی کے اعلان پر اطمینان کا اظہار کرتے ہوئے کہا کہ پاکستان کو کمزور نہ سمجھا جائے، بلکہ ہم سب کو اپنے ملک کی مضبوطی پر یقین رکھنا چاہیے۔
اداکار ہمایوں سعید نے انسٹاگرام پر سیز فائر پر اپنی خوشی کا اظہار کرتے ہوئے لکھا کہ پاکستان نے ہمیشہ امن کی بات کی ہے، اور جنگ کسی مسئلے کا حل نہیں ہے۔ ان کی امید ہے کہ دونوں ممالک میں اس امن کا سلسلہ برقرار رہے گا۔
اداکارہ یمنیٰ زیدی نے بھی جنگ بندی کے فیصلے پر خوشی کا اظہار کیا اور اسے پاکستان کی کامیابی قرار دیا۔ انہوں نے لکھا کہ ہمیشہ سچائی کی جیت ہوتی ہے اور اس سیز فائر سے امید ہے کہ دونوں ممالک میں امن قائم رہے گا۔
شوبز کی یہ شخصیات ایک ہی آواز میں یہ پیغام دے رہی ہیں کہ جنگ نہیں، امن ہی مسائل کا حل ہے اور وہ اپنے ملک کی حفاظت کے لیے ہر لمحہ تیار ہیں۔
