سابق وفاقی وزیر داخلہ شیخ رشید نے تھانہ آپبارہ کے ایس ایچ او اور ایک تفتیشی افسر پر الزام لگایا کہ وہ دونوں رشوت خوری میں ملوث ہیں اور انہوں نے اس حوالے سے دونوں پولیس افسران کے خلاف عدالت میں بھی درخواست جمع کرا دی ہے۔
تفصیلات کے مطابق مائیکروبلاگنگ ویب سائٹ ٹوئٹر پر جاری ٹوئٹس میں سربراہ عوامی مسلم لیگ شیخ رشید نے کہا کہ ایس ایچ او تھانہ آبپارہ اشفاق وڑائچ اور انوسٹی گیشن آفیسر عاشق حسین نے ان کے گھر ڈکیتی کی ہے۔ شیخ رشید نے الزام لگایا کہ یہ دونوں پولیس افسر ان کے گھر سے ان کی قیمتی گھڑیاں، اسلحہ، پیسے اور 3موبائل فون لے گئے ہیں۔
شیخ رشید نے دونوں مذکورہ افسران سے متعلق دعویٰ کیا کہ انہیں رانا ثنااللہ نے خصوصی طور پر ان کے خلاف جھوٹے مقدمات بنانے کیلئے اس تھانے میں تعینات کیا ہے۔
انہوں نے اس کے ساتھ دوسرے ٹوئٹ میں ایک ویڈیو بھی پوسٹ کی جس میں پولیس افسر کو شہری سے رشوت وصول کرتے ہوئے بھی دیکھا جا سکتا ہے۔ ویڈیو میں انوسٹی گیشن افسر عاشق کو رشوت کے پیسے وصول کرتے دیکھا جا سکتا ہے۔
شیخ رشید نے کہا کہ انہوں نے یہ ویڈیو عدالت میں بھی پیش کی تھی جہاں مجسٹریٹ نے انہیں ایڈیشنل سیشن جج کو درخواست دینے کی ہدایت کی، سابق وفاقی وزیر نے اعلان کیا کہ وہ اب ان دونوں افسروں کا سارا کچا چٹھا کھول دیں گے۔
- Featured Thumbs
- https://www.siasat.pk/data/files/s3/10sheikuisbpolicw.jpg
