پاک فوج کے شعبہ تعلقات عامہ (آئی ایس پی آر) کے مطابق بھارتی افواج کی حالیہ جارحیت میں مزید 2 جوان شہید ہوگئے ہیں، جس کے ساتھ شہداء کی تعداد 13 ہو گئی ہے جبکہ 78 اہلکار زخمی ہو چکے ہیں۔
6 اور 7 مئی کو بھارتی مسلح افواج کی جانب سے شروع کی گئی کھلی جارحیت نے نہ صرف معصوم شہریوں کو نشانہ بنایا بلکہ فوجی جوانوں کی بھی جان لی۔ اس بزدلانہ حملے میں خواتین، بچے اور بزرگ بھی متاثر ہوئے۔
آئی ایس پی آر کے مطابق شہید ہونے والے دو جوانوں میں ایک پاک فوج کے حوالدار محمد نوید اور دوسرے پاک فضائیہ کے سینئر ٹیکنیشن محمد ایاز شامل ہیں۔ دونوں جوان بھارتی حملے کے دوران زخمی ہوئے تھے اور ہسپتال میں زیر علاج تھے۔
آئی ایس پی آر نے اپنے بیان میں کہا کہ ان عظیم شہداء کی قربانیاں ہمارے قومی حوصلے اور حب الوطنی کی مظہر ہیں۔ ان کی جرأت اور فرض سے وفاداری ہمیشہ ہماری قوم کی تاریخ کا حصہ رہیں گی۔
پاکستان کی مسلح افواج نے شہداء کو اعلیٰ ترین خراجِ عقیدت پیش کرتے ہوئے ان کے غمزدہ خاندانوں سے دلی تعزیت کا اظہار کیا اور زخمیوں کی جلد صحت یابی کے لیے دعا کی۔
یہ یادگار قربانیاں پاکستان کے عوام کے دلوں میں ہمیشہ زندہ رہیں گی اور آنے والی نسلوں کے لیے قربانی اور جرات کی ایک روشن مثال ہوں گی۔
یہ بات بھی قابل ذکر ہے کہ 22 اپریل 2025 کو پہلگام واقعے کے بعد بھارت نے پاکستان پر الزام تراشی شروع کی تھی، جس کے بعد دونوں ممالک کے تعلقات کشیدہ ہو گئے تھے۔
