خواتین کے آئی سی سی ورلڈ کپ میں قومی ٹیم بھارت سے شکست کا شکار ضرور ہوئی ہوگی مگر ٹیم کی کپتان بسمہ معروف نے مداحوں کے دل جیت لیے ہیں۔
آئی سی سی ویمن ورلڈ کپ کے میچ کے دوران بھارت نے پاکستان کو ہرادیا مگر میچ کے دوران منظر عام پر آنے والی ایک تصویر پر قومی ٹیم کی کپتان بسمہ معروف سوشل میڈیا پر چھاگئی ہیں۔
مائیکروبلاگنگ ویب سائٹ ٹویٹر پر یہ تصویر آئی سی سی کے آفیشل ٹویٹر ہینڈل سے شیئر کی گئی جس میں بسمہ معروف اپنی 6 ماہ کی بیٹی کو گود میں اٹھائے کٹ پہنے اور سامان اٹھائے گراؤنڈ میں داخل ہوتی دکھائی دے رہی تھیں۔
آئی سی سی نے یہ تصویر شیئرکرتے ہوئے لکھا "کرکٹ کٹ، پیک بیگزاور گود میں بچہ، پاکستانی ویمن کرکٹ ٹیم کی کپتان بھارت کا مقابلہ کرنے کو تیار"۔
سوشل میڈیا صارفین نے اپنی فیملی کو ساتھ رکھتے ہوئے کھیل کے ساتھ اپنی لگن کو برقرار رکھنے پر ویمن کرکٹ ٹیم کی کپتان کو خوب سراہا۔
نائب صدر مسلم لیگ ن مریم نواز نے بھی بسمہ معروف کی تعریف کی۔
مونا فاروق نامی صارف نے لکھا کہ یہ ایک بہت طاقتور تصویر ہے جس میں ایک عورت کھیل کھیلتے اور ملک کی نمائندگی کرنے کے ساتھ ساتھ اپنی گھریلو ذمہ داریوں کو بھی برقرار رکھے ہوئے ہے۔
ایک اور صارف نے کہا کہ کیا آپ نے کسی مرد کھلاڑی کو اپنی کٹ اور بیگز کے ہمراہ بچہ تھامے بس سے اترتے دیکھا ہے؟ایسا کچھ نہیں ہے جو ہم خواتین نہیں کرسکتیں، کیونکہ ہم سب کچھ ایک ہی وقت میں کررہی ہوتی ہیں۔
پاکستان کی مشہور کرکٹر کمنٹیٹر مرینہ اقبال نے کہا کہ یہ تصویر ان تمام لوگوں کیلئے ایک پیغام ہے جنہیں یہ شک پیدا ہوا ہو کہ عورت اپنی پیشہ ورانہ اور نجی زندگی کو ایک ساتھ لے کر نہیں چل سکتی، بسمہ معروف کو سلام۔
بھارتی صحافی سپریتا داس نے لکھا کہ یہ کتنی طاقتور تصویر ہے، مائیں ہمیشہ جدوجہد کررہی ہوتی ہیں۔
بھارتی خواتین کرکٹرز کی جانب سے بسمہ معروف کی بیٹی فاطمہ کے ساتھ پیار کرنے کی تصاویر اور ویڈیوز بھی سوشل میڈیا پر بہت مقبول ہو رہی ہیں۔
واضح رہے کہ آئی سی سی ویمن ورلڈ کپ کے اہم میچ میں بھارت نے پاکستانی ٹیم کو107 رنز سے شکست دیدی ہے۔
- Featured Thumbs
- https://www.siasat.pk/data/files/s3/19femalecricket.jpg
