معاشی استحکام کے حکومتی دعوے ہوا ہونا شروع ہوگئے ہیں، ڈالر سستا ہونے کےبجائے مزید مہنگا ہوتا چلاجارہا ہے،16 اگست سے اب تک ڈالر کی قدر میں تقریباساڑھے 9 روپے اضافہ ہوچکا ہے۔
خبررساں ادارے کی رپورٹ کے مطابق آج انٹربینک میں امریکی ڈالر پورے 2 روپے مہنگا ہونے کےبعد 223روپے 42 پیسے کی سطح پر آگیا ہے، اوپن مارکیٹ میں ڈالر کی قدر 1 روپیہ اضافہ سے 234 روپے ہوگئی ہے۔
دوسری جانب آج اسٹاک ایکسچینج میں بھی کاروبار کے دوران منفی رجحان دیکھا گیا اور کاروبار کےاختتام تک کراچی اسٹاک ایکسچینج کے ہنڈرڈ انڈیکس میں معمولی کمی ریکارڈ کی گئی۔
کراچی اسٹاک ایکسچینج ہنڈرڈ انڈیکس 94پوائنٹس کی کمی کے بعد 41ہزار766 پوائنٹس کی سطح پر بند ہوا ہے۔
معاشی تجزیہ کاروں کے مطابق ڈالر کوقابو کرنے سے متعلق حکومت و اسٹیٹ بینک کی پالیسی کام نہیں کررہی، حکومت نے اس معاملے میں غیر ضروری درآمداتت اور اسٹیٹ بینک نے درآمدی ادائیگیوں پر غیر رسمی پابندی عائد کردی ہے تاہم ان اقدامات کے باوجود ڈالر کی قدر میں کمی واقع نہیں ہورہی ۔
