سابق اسپیکر قومی اسمبلی اسد قیصر کا کہنا ہے کہ ہم نے استعفے اسمبلی فلور پر کھڑے ہوکر دئیے اس لیے ہمیں اب دوبارہ ایوان میں جانے کی ضرورت نہیں۔
تفصیلات کے مطابق نجی چینیل اے آر وائی کے پروگرام میں گفتگو کرتے ہوئے پی ٹی آئی رہنما اور سابق اسپیکر قومی اسمبلی کا کہنا تھا کہ جب میں نے استعفیٰ دیا ان دنوں عدم اعتماد تحریک بھی آئی ہوئی تھی۔
انہوں نے کہا کہ مجھے شرف حاصل ہے کہ میں نے اعلان کیا تھا کہ عمران خان وزیراعظم ہیں، میں یہ نہیں کہہ سکتا تھا کہ عمران خان وزیراعظم نہیں رہے، اسی لئے اسپیکر شپ سے مستعفی ہوا۔
اسد قیصر نے کہا کہ ہمارے تمام ارکان اسمبلی نے فلور پر کھڑے ہوکر استعفے دیئے اور قانونی تقاضے پورے کیے، جب آپ اسمبلی کے فلور پر کھڑے ہو کر استعفے دیں تو دوبارہ ایوان میں جانے کی ضرورت ہی نہیں رہتی۔
سابق اسپیکر نے الزام عائد کیا کہ موجودہ اسپیکر قومی اسمبلی راجہ پرویز اشرف ہمارے استفعوں پر بہانے بازی سے کام لے رہے ہیں انہوں نے یہ بھی انکشاف کیا کہ مجھے شک ہے کہ سیکریٹریٹ نے عدالت کو پوری دستاویز نہیں بھجوائیں۔
اسد قیصر نے پنجاب حکومت کے خلاف اٹھائے گئے اقدام پر کہا کہ اس آئین شکنی سے واضح ہوا کہ پی ڈی ایم آئین اور قانون سے کھلواڑ کر رہی ہے۔
