سروگیٹ کمپنیوں کی ورچوئل ایڈورٹائزنگ کے معاملے پر نیا تنازعہ کھڑا ہوگیا ہے، پاکستان ٹیلی ویژن کے اسپورٹس چینل نے پاک آسٹریلیا سیریز کی نشریات بند کردی ہے۔
تفصیلات کے مطابق جوئے اور سٹہ بازی میں ملوث(سروگیٹ) کمپنیوں کی جانب سے ورچوئل ایڈورٹائزنگ شروع کرنے کے معاملے پر ایک نیا تنازعہ کھڑا ہوگیا ہے جس کے بعد پی ٹی وی اسپورٹس کی جانب سے بھی بیان سامنے آگیا ہے۔
پاکستان میں سروگیٹ کمپنیوں پر پابندی عائد ہونے کے بعدان کمپنیوں نے ورچوئل ایڈورٹائزنگ کا سہارا لیا، آسٹریلیا میں جاری پاک آسٹریلیا ٹیسٹ سیریز کے دوران بھی ان کمپنیوں نے جدید سافٹ ویئرز کی مدد سے میچ کی نشریات کے دوران گراؤنڈ میں اپنے لوگو اور اشتہارات چلوائے حالانکہ حقیقت میں گراؤنڈ کے اندر کوئی بھی اشتہار نہیں لگا ہوا۔
تنازعہ اس وقت مزید شدید ہوگیا جب غیر ملکی اسپورٹس چینل فاکس نیوز پر دکھائے گئے میچ میں ان کمپنیوں کے اشتہارات موجود نہیں تھے جبکہ پاکستان میں دکھائے جانے والے میچ میں یہ اشتہارات موجود تھے جس کے بعد پی ٹی وی انتظامیہ حرکت میں آگئی اور میچز کی نشریات بند کردی۔
پی ٹی وی کی جانب سے جاری کردہ اعلامیہ میں کہا گیا ہے کہ سروگیٹ کمپنیوں کی تشہیر سے متعلق پالیسی کے مدنظر پی ٹی وی پاک آسٹریلیا ٹیسٹ سیریز کی نشریات نشرنہیں کررہا، جیسے ہی معاملہ حل ہوگا نشریات بحال کردی جائے گی۔
پی ٹی وی نے میچز کے بنیادی رائٹ ہولڈرز اور کرکٹ آسٹریلیا سے رابطہ کرکے اس سلسلے کو حل کرنے کا مطالبہ کیا اور ورچوئل اشتہارات کے بغیر کلین فیڈ فراہم کرنے کا کہا مگر اس پر کوئی مثبت جواب موصول نہیں ہوا۔
کرکٹ آسٹریلیا نے موقف اپنایا کہ آسٹریلیا کے علاوہ دیگر تمام ممالک کو فراہم کی جانے والی فیڈ اسی ورچوئل ایڈورٹائزنگ سے مزین ہے لہذا اسے جاری سیریز کے دوران تبدیل نہیں کیا جاسکتا، جس پر اشتہارات کو بلیک آؤٹ کے ذریعے چھپانے کی بات کی گئی تو اس کو بھی تسلیم نہیں کیا گیا ۔
خدشہ ہے کہ اگر یہ تنازعہ حل نا ہوا تو پی ٹی وی میلبرن ٹیسٹ بھی لائیو نشر نہیں کرے گا، تاہم امکان ہے کہ اس میچ کی نشریات ٹین اسپورٹس پر نشر کی جائے گی۔
