آسٹریلیا میں جاری بگ بیش لیگ میں پاکستانی فاسٹ باؤلر حارث رؤف کی بغیر پیڈز کیے بیٹنگ کیلئے میدان میں اترنے کی ویڈیو وائرل ہوگئی ہے۔
تفصیلات کے مطابق آسٹریلیا میں جاری بگ بیش لیگ کے 13 ویں سیزن کے دوران میلبرن اسٹارز اور سڈنی تھنڈرز کے درمیان میچ میں ایک عجیب و غریب واقعہ پیش آیا جس نے کرکٹ شائقین کو حیرانی میں مبتلاکردیا۔
ہوا کچھ یوں کہ میلبرن اسٹارز کے تین بیٹسمین ایک اوور میں یکے بعد آؤٹ ہوکر پویلین لوٹ گئے جس پر میلبرن اسٹارز کے گیارویں نمبر کے کھلاڑی حارث رؤف کو بیٹنگ کیلئے میدان میں اترنا پڑا۔
یکے بعد دیگرے تین کھلاڑیوں کے آؤٹ ہونے پر حارث رؤف کو بالکل بھی تیاری کا موقع نہیں مل سکا اور وہ ٹائمڈ آؤٹ ہونے سے بچنے کیلئے بغیر پیڈز پہنے وکٹ پر پہنچ گئے، حارث رؤف نے ہیلمٹ بھی کریز پر پہنچنے کے بعد پہنا اور گلوز ہاتھ میں تھامے کھڑے رہے۔
بغیر پیڈز کیے میدان میں اترنے کی ایک وجہ یہ بھی تھی کہ اننگز کی آخری گیند باقی تھی اور حارث رؤف کو نان اسٹرائیکر اینڈ پر کھڑا ہونا تھا، لہذا انہوں نے تیاری کرنے کا تکلف کرنا مناسب نہیں سمجھا اور ایسے ہی میدان میں اتر آئے۔
حارث رؤف کی ہیلمٹ پہنے ہاتھ میں گلوز پکڑے بغیر پیڈز کریز پر موجودگی کی ویڈیو بگ بیش لیگ کے آفیشل سوشل میڈیا اکاؤنٹس سے شیئر کی گئی جبکہ میلبر ن اسٹار نے بھی حارث رؤف کی تصویر شیئر کی، جس کے بعد سوشل میڈیا صارفین نے اس واقعہ پر دلچسپ تبصرےکیے۔
