Advertisement

Is there any Wahi other than Quran? | سیرتِ رسول ﷺ وحی نہیں؟ | Ghamidi


01:41 — حسن الیاس صاحب

ہم نے آپ کی زبان سے وہ اصطلاح نہیں سنی جو حدیث کے لیے ہمارے روایتی علم میں رائج ہے جسے کہا جاتا ہے کہ یہ "وحی غیر متلو" ہے، یعنی وہ وحی جس کی تلاوت نہیں ہوتی۔ میں آپ سے یہ پوچھنا چاہتا ہوں کہ جو حدیثی ذخیرہ ہمارے سامنے ہے، جس میں رسول الله صلى الله عليه وسلم کے فیصلے، تفہیم، تبین، شرح اور وضاحت محفوظ ہیں، کیا ان کے اندر وحی شامل تھی؟ یعنی جو کچھ آپ کر رہے تھے، کیا اس میں الله کی طرف سے رہنمائی دی جا رہی تھی؟ اس لیے کہ قرآن مجید میں بہت مثالیں ملتی ہیں۔ مثلاً قرآن کہتا ہے کہ اب ہم نے آپ کا قبلہ تبدیل کر دیا۔ تو پچھلا قبلہ کب بدلا تھا، کب ہدایت دی گئی تھی؟ قرآن کے علاوہ بھی وحی موجود ہے۔ اگر حدیثوں میں بھی وحی تھی تو پھر اس کو "وہ وحی جس کی تلاوت نہیں ہوتی" کہنا کیا معنی رکھتا ہے؟

02:32 — جاوید احمد غامدی صاحب

اس معاملے میں تو کبھی کوئی شبہ نہیں رہا۔ میں نے اپنی تفسیر میں درجنوں جگہ لکھا ہے کہ رسول الله صلى الله عليه وسلم نبی بھی ہیں اور رسول بھی۔ نبی اور رسول ہونے کا مطلب ہی یہ ہے کہ ان پر وحی کی جاتی ہے۔ یہ نہیں کہ صرف کتاب نازل ہو۔ اس کا مطلب یہ ہے کہ وہ الله کے مخاطب ہوتے ہیں۔ صبح وحی ہو جائے، شام وحی ہو جائے، کس وقت کس معاملے میں ہوتی تھی، مجھے کبھی اسے متعین کرنے کی ضرورت محسوس نہیں ہوئی۔ وجہ یہ ہے کہ اگر وحی کی جائے اور اس کا حکم دیا جائے تو وہ واجب الاطاعت ہے، اور اگر وحی نہ کی جائے اور رسول اپنی حیثیت میں کوئی اجتہاد کریں، کوئی رائے قائم کریں، وہ بھی واجب الاطاعت ہے۔ جب اطاعت دونوں صورتوں میں لازم ہے تو بار بار فرق بتانے کی کوئی ضرورت نہیں۔ میرے نزدیک رسول الله صلى الله عليه وسلم کی ذات ہی دین کا پہلا ماخذ ہے۔ جب تحقیق سے معلوم ہو جائے کہ یہ بات آپ کی ہے، اور ظن غالب ہو جائے کہ یہ آپ ہی سے منقول ہے، تو اسے ماننا لازم ہے۔ اس میں کبھی کوئی تردد نہیں رہا۔

میں بار بار اس لیے نہیں کہتا کہ میرے ہاں استدلال "وحی" کی بنیاد پر نہیں ہوتا، بلکہ "رسالت" کی بنیاد پر ہوتا ہے۔ دونوں چیزیں الله کا غیر معمولی اعجاز ہیں۔ ایک قرآن اور سنت ہیں جو آپ نے الله کی طرف سے پیش کیے۔ ان دونوں کے بارے میں معلوم ہے کہ چالیس سالہ زندگی میں کوئی بھی آثار نہیں ملتے جو اس درجے کا علم دکھائیں۔ دوسری چیز یہ ہے کہ ایک عالم کیسے بنتا ہے؟ وہ پڑھتا ہے، پرانے ذخیرے دیکھتا ہے، برسوں غور و فکر کرتا ہے، تب کہیں جا کر وہ کسی بات کے قابل ہوتا ہے۔ رسول الله صلى الله عليه وسلم کا علم براہ راست الله کی عطا ہے۔ جب وحی ہوتی ہے تو ظاہر ہے وحی ہوتی ہے، لیکن جب وحی نہیں ہوتی تب بھی قرآن نے بتایا ہے کہ الله پیغمبروں کو علم اور حکم عطا کرتا ہے۔ یہ رسول الله صلى الله عليه وسلم کو بھی ویسے ہی عطا ہوا ہے۔ اگر کوئی دیکھنا چاہے تو آپ کے اجتہادات اور اطلاقات کو دیکھ لے کہ آپ نے کس طرح دین کے معاملات کو کھول کر بیان کیا ہے۔ یہ وہ درجہ ہے جس کے لیے ہم آسمان کی طرف دیکھتے ہیں۔ تو آپ کا علم بھی الله کی عطا ہے، اس کے لیے مجھے وحی سے استدلال کرنے کی ضرورت ہی نہیں پڑتی۔

05:51 — حسن الیاس صاحب

سبحان الله۔ بہت گہرا نکتہ پیش فرمایا۔ اسی نقطے پر بہت تنقیدیں کی جاتی ہیں، لیکن یہ بات کافی وضاحت کر دیتی ہے۔ اس میں یہ پہلو بھی ہے کہ پیغمبر کے ساتھ جو مخاطبہ الہی ہے، وہ نبوت کی حقیقت ہے۔ الله ہر وقت خطاب کر سکتا ہے، صبح کرے یا شام۔ لیکن خود الله نے فیصلہ کیا ہے کہ کون سا کلام لوگوں تک کتاب کی صورت میں پہنچانا ہے اور کون سا نہیں پہنچانا۔ جب یہ تقسیم الله نے خود کر دی ہے تو پھر ہمیں بحث کی ضرورت نہیں رہتی۔ بس ایک چیز کو ملحوظ رکھنا ہے۔

06:33 — جاوید احمد غامدی صاحب

الله نے اپنی کتاب نازل کی جو خصوصی اہتمام کے ساتھ نازل ہوئی۔ اس کو اپنے الفاظ میں نازل کیا، مرتب کیا اور منظم شکل میں پہنچا دیا۔ رسول الله صلى الله عليه وسلم نے اسی کتاب کو سامنے رکھ کر اس کے مطالب میں سنت جاری کی۔ سنت بھی اجماع اور تواتر سے منتقل ہو گئی۔ یہی پورا دین ہے۔ اس کے بعد رسول الله صلى الله عليه وسلم کا وہ علم ہے جو دین کا علم ہے، جیسے علماء کے ہاں علم ہوتا ہے۔ اس علم کی مثالیں قرآن میں موجود ہیں۔ ایک مثال آپ نے دی کہ قبلہ تبدیل ہوا۔ پہلی ہدایت کب آئی، یہ ہم نہیں جانتے۔ اسی طرح رسول الله صلى الله عليه وسلم کی جدوجہد میں بہت سے معاملات تھے جن میں وحی کے ذریعے رہنمائی کی جاتی تھی۔ تاریخ میں بھی اس کے شواہد ہیں۔ جبریل امین کا اکثر آنا، ان کا حالات پر تبصرہ کرنا، یہ سب تاریخ میں محفوظ ہے۔

پیغمبر کا معاملہ میرا اور آپ کا معاملہ نہیں۔ سب کچھ براہ راست الله کی نگرانی میں ہوتا ہے۔ کون سی بات آپ کو کہنی تھی، ضروری تھی، وہ آپ کو بتائی گئی۔ قرآن میں گھریلو معاملات تک سب کچھ بیان ہوا ہے۔ جیسے واقعہ تحریم میں الله نے آپ کو باخبر کر دیا۔ وہ معاملہ میرے جاننے کی چیز نہیں۔ لیکن ہوا تو اس کا ذکر آ گیا۔ تو صبح شام وحی آئے یا نہ آئے، یہ پیغمبری کی حقیقت ہے۔ اصل بات یہ ہے کہ ہر چیز کو اس کی جگہ رکھیں۔ قرآن قرآن ہے، سنت قرآن کے ساتھ دین کا حکم ہے، اور حدیث تفہیم و تشریح کا ذخیرہ ہے۔ اگر حدیث نہ ملتی تو دین کا کوئی حصہ ضائع نہ ہوتا، لیکن علم کی بڑی دولت متاثر ہو جاتی۔

09:32 — حسن الیاس صاحب

غامدی صاحب، ایک فقہی نوعیت کا سوال منطقی ذہن کی طرف سے یہ کیا جاتا ہے کہ رسالت مآب صلى الله عليه وسلم نے شروع میں لکھنے سے منع فرمایا اور زبانی نقل کرنے کی اجازت دی۔ یہ بات خود آپ کو کیسے معلوم ہوئی؟ حدیث ہی سے نا۔ تو جب حدیث ظنی ماخذ ہے، ظنی درجے میں ہے، تو اس سے اتنی مضبوط دلالت کیسے لے لی گئی؟ وہ تو یقین کے درجے کا فائدہ نہیں دیتی۔ پھر آپ اس درجے میں ایک تاریخی بات کو اتنی مضبوطی سے کیسے بیان کر دیتے ہیں؟

10:03 — جاوید احمد غامدی صاحب

میں کوئی بات قطعی کے درجے میں بیان نہیں کر رہا، ہر چیز کو اسی درجے میں بیان کر رہا ہوں جس درجے میں وہ خود ہے۔ اگر کوئی چیز ہمارے مشاہدے میں آ گئی ہو، یا علم و عقل کا لازمی نتیجہ ہو، یا اجماع و تواتر سے منتقل ہوئی ہو، تو اسے ہم قطعی اور یقینی کہتے ہیں۔ اگر کوئی چیز ظنیات کے درجے میں ہو تو پھر دنیا بھر کے علم میں اصول یہی ہے کہ وہاں ظن غالب کے ساتھ بات کی جاتی ہے۔ وہاں یہ نہیں کہا جاتا کہ ہم نے اپنی آنکھوں سے دیکھ لیا یا ہم پر وحی ہو گئی۔ وہاں استدلال کے ساتھ بات کی جاتی ہے۔

گفتگو کس موضوع پر ہو رہی ہے؟ حدیث پر۔ حدیث خود کیا ہے؟ رسالت مآب صلى الله عليه وسلم کے زمانے کی تاریخ۔ تاریخ ہمیشہ اخبارِ آحاد سے منتقل ہوتی ہے اور اخبارِ آحاد ظنی ہوتے ہیں۔ اس کا صرف وہ حصہ قطعی ہوتا ہے جو اجماع و تواتر سے منتقل ہو۔ اس لیے وہاں تو استدلال انہی روایات سے کیا جائے گا۔ روایتیں کیا کہتی ہیں، ہماری تاریخ کیا ہے، اور اسی تاریخ میں روایتیں کیا بتا رہی ہیں، سب کچھ وہیں سے لیا جائے گا۔ یہاں قطعیت کا سوال سرے سے پیدا ہی نہیں ہوتا۔ یہ سب ظن غالب کے درجے کی چیزیں ہیں۔

11:17 — حسن الیاس صاحب

ٹھیک ہے، ایک اور پہلو بھی اس میں موجود ہے۔ آپ نے خود تاریخی ذخیرے سے، تاریخی ماخذ سے، جس کردار پر گفتگو ہو رہی ہے، اسی کا اپنا بیان پیش کیا۔ اگر یہ سب کچھ غالب گمان (ظنِّ غالب) پر مبنی ہے اور کسی کے پاس اس کے برخلاف کوئی اور اطلاع ہو تو وہ اطلاع بھی پیش کی جا سکتی ہے۔ جب وہ پیش کرے گا تو کیا آپ اپنی اس غالب گمان (ظنِّ غالب) رائے پر دوبارہ غور کے لیے آمادہ ہوں گے؟

11:38 — جاوید احمد غامدی صاحب

بالکل، اور یہی طریقہ ہے جو ہر تاریخی ذخیرے میں اختیار کیا جاتا ہے۔ ہم روایات پڑھتے ہیں تو ان سے ہمارے پاس کچھ معلومات آتی ہیں۔ پھر ہم دیکھتے ہیں کہ کیا یہ تاریخ اجماع و تواتر سے منتقل ہوئی تاریخ کے خلاف تو نہیں، علم و عقل کے مسلمات کے خلاف تو نہیں۔ یہ ساری چیزیں چیک کی جاتی ہیں۔ لیکن جو چیز اس طرح کے قطعی ذرائع سے نہیں پہنچی، کیا اسے ہم دریا برد کر دیتے ہیں؟ آج جو بھی علم دنیا میں منتقل ہو رہا ہے، اسی طرح غالب گمان (ظنِّ غالب) بنیادوں پر منتقل ہو رہا ہے۔

میں یہ تک یقینی درجے میں نہیں کہہ سکتا کہ ارسطو اور افلاطون کی جو کتابیں ہمارے پاس ہیں وہ فی الواقع انہی کی لکھی ہوئی ہیں۔ یہ سب غالب گمان (ظنِّ غالب) کے درجے کی چیزیں ہیں۔ ہماری پوری علمی زندگی انہی پر چلتی ہے۔ انہی بنیادوں پر ہم علوم سیکھتے اور سکھاتے ہیں، اپنی نسلوں کی تربیت کرتے ہیں۔ فرق صرف یہ رکھا جاتا ہے کہ جب کوئی چیز قطعی ذریعے سے مل جائے تو پہلے سے موجود معلومات کو اس پر پرکھا جاتا ہے، انہیں مرتب کیا جاتا ہے۔ علم اسی طرح آگے بڑھتا ہے۔ تو حدیث اور تاریخ بھی اسی دائرے کی چیز ہیں، انہیں اسی درجے میں رکھ کر بیان کیا جاتا ہے۔ میں نے کب کہا کہ روایتوں میں جو کچھ ہے وہ بالکل قطعی، آخری اور غیر قابلِ اختلاف حق ہے؟ مسلمانوں کے علم میں کبھی اہلِ علم نے یہ بات نہیں کہی، ایک آدھ استثناء ہو تو ہو۔

13:01 — حسن الیاس صاحب

اچھا، اسی سلسلے کا ایک اور سوال ہے۔ ایک آیت خطیب حضرات اور دین کے معلمین اکثر پڑھتے ہیں: ﴿وَمَا يَنطِقُ عَنِ الْهَوَىٰ، إِنْ هُوَ إِلَّا وَحْيٌ يُوحَىٰ﴾ کہ پیغمبر جو کچھ بھی زبان سے نکالتے تھے، وہ وحی ہی ہوتا تھا۔ آپ نے پہلے بھی ذکر کیا کہ پیغمبر کو الگ سے بھی وحی کی جاتی تھی، اس کی کوئی نفی نہیں۔ لیکن یہ جو دعویٰ کیا جاتا ہے کہ آپ کا ہر قول وحی تھا، اور اس کے لیے سورۂ نجم کی یہ آیات پیش کی جاتی ہیں، اس پر آپ کیا کہتے ہیں؟

13:32 — جاوید احمد غامدی صاحب

سورۂ نجم کو نکال کر شروع سے آخر تک پڑھیے، سادہ ترجمہ کر کے بھی دیکھ لیجیے، فوراً واضح ہو جائے گا کہ یہاں ضمیر کا مرجع کیا ہے۔ قرآن مجید میں جب اس طرح کی ضمیر آتی ہے اور کوئی قرینہ نہ ہو تو اس سے مراد قرآن ہوتا ہے۔ اگر تردد ہو تو ﴿إِنَّا أَنْزَلْنَاهُ فِي لَيْلَةِ الْقَدْرِ﴾ دیکھ لیجیے کہ وہاں بھی ضمیر کا مرجع قرآن ہی ہے۔ جو چیز الله تعالیٰ کی طرف سے نازل ہوئی اور جسے آپ نے الله کے کلام کے طور پر پیش کیا، وہ قرآن ہے۔ یہاں قرآن ہی زیرِ بحث ہے اور بتایا جا رہا ہے کہ یہ قرآن آپ اپنی خواہش سے نہیں پیش کر دیتے۔ یہ تو وحی ہے جو الله کی طرف سے آتی ہے۔ جب الله کہتے ہیں پیش کیجیے تو آپ پیش کرتے ہیں، جب کہتے ہیں پڑھ کر سنائیے تو آپ پڑھ کر سناتے ہیں۔ اپنی طرف سے نہ آپ اسے گھڑ سکتے ہیں، نہ اس میں تبدیلی کر سکتے ہیں۔ ساری باتیں قرآن میں واضح کر دی گئی ہیں۔ اس لیے وہاں ﴿إِنْ هُوَ إِلَّا وَحْيٌ يُوحَىٰ﴾ کی ضمیر قرآن کے لیے ہے، ہر بات کے لیے نہیں جو آپ نے زندگی میں فرمائی۔

14:32 — حسن الیاس صاحب

تو آپ جو بات فرما رہے ہیں، یہ صرف آپ ہی کا نقطہ نہیں بلکہ امت کے جمہور اہلِ علم بھی اسی آیت کو اسی مفہوم میں لیتے ہیں؟

14:40 — جاوید احمد غامدی صاحب

جی، بالکل۔ عام طور پر ہمارے اہلِ علم نے بھی اسی معنی کی صراحت کی ہے۔ اس سے قرآن کی اصالت اور حجت پر کوئی فرق نہیں پڑتا۔ قرآن مجید کی بنیاد پر ہی دین قائم ہے۔ جس نے بھی کوئی استدلال کرنا ہے، اسی کتاب سے کرے گا۔ یہاں جمہور کا حوالہ دینا اصل نکتہ نہیں، اصل چیز یہ ہے کہ علم و عقل کے مسلمہ اصول بھی اسی مفہوم کی تائید کرتے ہیں۔​
 
Advertisement
Allah has not given any hidden revelation to the Prophet Mohammad.

إِنَّاۤ أَنزَلۡنَا عَلَیۡكَ ٱلۡكِتَـٰبَ لِلنَّاسِ بِٱلۡحَقِّۖ فَمَنِ ٱهۡتَدَىٰ فَلِنَفۡسِهِۦۖ وَمَن ضَلَّ فَإِنَّمَا یَضِلُّ عَلَیۡهَاۖ وَمَاۤ أَنتَ عَلَیۡهِم بِوَكِیلٍ ۝٤
39:41 We revealed to you the Scripture for mankind with truth. Whoever follows guidance does so for his good, and whoever goes astray does so to his own loss. You are not responsible for them.
 
Allah has not given any hidden revelation to the Prophet Mohammad.

إِنَّاۤ أَنزَلۡنَا عَلَیۡكَ ٱلۡكِتَـٰبَ لِلنَّاسِ بِٱلۡحَقِّۖ فَمَنِ ٱهۡتَدَىٰ فَلِنَفۡسِهِۦۖ وَمَن ضَلَّ فَإِنَّمَا یَضِلُّ عَلَیۡهَاۖ وَمَاۤ أَنتَ عَلَیۡهِم بِوَكِیلٍ ۝٤
39:41 We revealed to you the Scripture for mankind with truth. Whoever follows guidance does so for his good, and whoever goes astray does so to his own loss. You are not responsible for them.​
إِنَّا أَنزَلْنَا عَلَيْكَ الْكِتَابَ لِلنَّاسِ بِالْحَقِّ ۖ فَمَنِ اهْتَدَىٰ فَلِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۖ وَمَا أَنتَ عَلَيْهِم بِوَكِيلٍ (سورة الزمر:41)
بے شک ہم نے آپ پر یہ کتاب سچی لوگو ں کے لیے اتاری ہے پھر جو راہ پر آیا سو اپنے لیے اور جو گمراہ ہوا سو وہ گمراہ ہوتا ہے اپنے برے کو اور آپ ان کے ذمہ دار نہیں ہیں

آپ نے جو آیت پیش کی ہے، اس میں کسی جگہ یہ نہیں لکھا کہ الله نے نبی پر قرآن کے علاوہ کوئی رہنمائی نہیں فرمائی۔ آیت صرف یہ بتا رہی ہے کہ قرآن انسانوں کی ہدایت کے لیے نازل کیا گیا۔ یہ بات تو سب مانتے ہیں۔ لیکن یہ نتیجہ آپ خود شامل کر رہے ہیں کہ “لہٰذا قرآن کے علاوہ نبی صلى الله عليه وسلم پر کوئی رہنمائی نہیں آتی تھی”۔ یہ نتیجہ قرآن نہیں دیتا، یہ آپ اپنے ذہن سے اس میں ڈال رہے ہیں۔

اگر قرآن واقعی صرف “کتاب” کے نزول کا ذکر کرتا اور نبی کو کسی دوسرے الہی رہنمائی کے بغیر چھوڑ دیتا، تو پھر بہت سے واقعات کا کوئی مطلب باقی نہ رہتا۔ مثال کے طور پر قرآن خود بتاتا ہے کہ الله نبی کو بعض جگہوں پر باخبر کر دیتا تھا۔ جیسے واقعہ تحریم میں فرمایا گیا :۔

وَإِذْ أَسَرَّ النَّبِيُّ إِلَىٰ بَعْضِ أَزْوَاجِهِ حَدِيثًا فَلَمَّا نَبَّأَتْ بِهِ وَأَظْهَرَهُ اللَّهُ عَلَيْهِ عَرَّفَ بَعْضَهُ وَأَعْرَضَ عَن بَعْضٍ ۖ فَلَمَّا نَبَّأَهَا بِهِ قَالَتْ مَنْ أَنبَأَكَ هَـٰذَا ۖ قَالَ نَبَّأَنِيَ الْعَلِيمُ الْخَبِيرُ
(سورة التحريم:3)
اور جب نبی نے چھپا کر اپنی کسی بیوی سے ایک بات کہہ دی اور پھر جب اس بیوی نے وہ بات بتا دی اور الله نے اس کو نبی پر ظاہر کر دیا تو نبی نے اس میں سے کچھ بات جتلا دی اور کچھ ٹال دی پس جب پیغمبر نے اس کو وہ بات جتلا دی تو بولی آپ کو کس نے یہ بات بتا دی آپ نے فرمایا مجھے خدائے علیم و خبیر نے یہ بات بتلائی

اور پھر الله نے یہ راز نبی کو بتا دیا کہ یہ بات کس نے افشا کی۔ یہ تو قرآن کا اپنا بیان ہے کہ نبی کو قرآن کے علاوہ بھی رہنمائی دی جاتی تھی۔

پھر قرآن یہ بھی کہتا ہے :۔

وَلَوْلَا فَضْلُ اللَّهِ عَلَيْكَ وَرَحْمَتُهُ لَهَمَّت طَّائِفَةٌ مِّنْهُمْ أَن يُضِلُّوكَ وَمَا يُضِلُّونَ إِلَّا أَنفُسَهُمْ ۖ وَمَا يَضُرُّونَكَ مِن شَيْءٍ ۚ وَأَنزَلَ اللَّهُ عَلَيْكَ الْكِتَابَ وَالْحِكْمَةَ وَعَلَّمَكَ مَا لَمْ تَكُن تَعْلَمُ ۚ وَكَانَ فَضْلُ اللَّهِ عَلَيْكَ عَظِيمًا
(سورة النساء:113)
اور اگر تجھ پر الله کا فضل اور اس کی رحمت نہ ہوتی تو ان میں سے ایک گروہ نے تمہیں غلط فہمی میں مبتلا کرنے کا فیصلہ کرہی لیا تھا حالا نکہ وہ اپنے سوا کسی کو غلط فہمی میں مبتلانہیں کر سکتے تھے اور وہ تمہارا کچھ نہیں بگاڑ سکتے تھے اور الله نے تجھ پر کتاب اور حکمت نازل کی ہے اور تجھے وہ باتیں سکھائی ہیں جو تو نہ جانتا تھا اور الله کا تجھ پر بہت بڑا فضل ہے


یعنی الله نے نبی کو وہ کچھ سکھایا جو آپ نہ جانتے تھے۔ کیا یہ سب صرف قرآن کی آیات تھیں؟ ظاہر ہے کہ نہیں۔ قرآن ایک کتاب ہے، مگر رسالت ایک پورا منصب ہے، جس میں الله اپنے پیغمبر کی رہنمائی کرتا ہے، کبھی وحی سے، کبھی الہام سے، کبھی تنبیہ سے، کبھی براہ راست فیصلے سے۔

اسی طرح واقعۂ قبلہ۔ قرآن کہتا ہے :۔

قَدْ نَرَىٰ تَقَلُّبَ وَجْهِكَ فِي السَّمَاءِ ۖ فَلَنُوَلِّيَنَّكَ قِبْلَةً تَرْضَاهَا ۚ فَوَلِّ وَجْهَكَ شَطْرَ الْمَسْجِدِ الْحَرَامِ ۚ وَحَيْثُ مَا كُنتُمْ فَوَلُّوا وُجُوهَكُمْ شَطْرَهُ ۗ وَإِنَّ الَّذِينَ أُوتُوا الْكِتَابَ لَيَعْلَمُونَ أَنَّهُ الْحَقُّ مِن رَّبِّهِمْ ۗ وَمَا اللَّهُ بِغَافِلٍ عَمَّا يَعْمَلُونَ
(سورة البقرة:144)
بے شک ہم آپ کے منہ کا آسمان کی طرف پھرنا دیکھ رہے ہیں سو ہم آپ کو اس قبلہ کی طرف پھیر دیں گے جسے آپ پسند کرتے ہیں پس اب اپنا منہ مسجد حرام کی طرف پھیر لیجیئے اور جہاں کہیں تم ہوا کرو اپنے مونہوں کو اسی کی طرف پھیر لیا کرو اور بے شک وہ لوگ جنہیں کتاب دی گئی ہے یقیناً جانتے ہیں کہ وہی حق ہے ان کے رب کی طرف سے اور الله اس سے بے خبر نہیں جو وہ کر رہے ہیں

یعنی ہم دیکھ رہے ہیں کہ آپ آسمان کی طرف رخ کرتے رہتے ہیں۔ یہ قرآن کا اپنا بیان ہے کہ نبی پہلے سے کسی ہدایت کے انتظار میں تھے۔ اب بتائیں وہ پہلی ہدایت کہاں لکھی ہوئی تھی؟ قرآن میں کہیں نہیں۔ اس کا مطلب ہے کہ الله کی رہنمائی قرآن کے علاوہ بھی ہوتی تھی۔

اسی طرح نبی کو جنگ کے مواقع پر خصوصی ہدایات ملیں۔ بدر کے قیدیوں کے بارے میں فیصلہ ہوا، پھر قرآن نے اس پر تبصرہ کیا۔ یہ سب قرآن کے علاوہ الہی رہنمائی ہی تھی۔

مَا كَانَ لِنَبِيٍّ أَن يَكُونَ لَهُ أَسْرَىٰ حَتَّىٰ يُثْخِنَ فِي الْأَرْضِ ۚ تُرِيدُونَ عَرَضَ الدُّنْيَا وَاللَّهُ يُرِيدُ الْآخِرَةَ ۗ وَاللَّهُ عَزِيزٌ حَكِيمٌ
(سورة الأنفال:67)
نبی کو نہیں چاہیئے کہ اپنے ہاں قیدیوں کو رکھے یہاں تک کہ ملک میں خوب خونریزی کر لے تم دنیا کی زندگی کا سامان چاہتے ہو اور الله آخرت کا ارادہ کرتا ہے اور الله غالب حکمت والا ہے
لَّوْلَا كِتَابٌ مِّنَ اللَّهِ سَبَقَ لَمَسَّكُمْ فِيمَا أَخَذْتُمْ عَذَابٌ عَظِيمٌ (سورة الأنفال:68)
اگر الله کا حکم پہلے نہ ہو چکا ہوتا تو جو تم نے لیا اس کے بدلے تم پربڑا عذاب ہوتا

آپ کی پیش کی گئی آیت صرف یہ بتاتی ہے کہ قرآن ہدایت کے لیے نازل ہوا ہے۔ اس سے یہ ہرگز ثابت نہیں ہوتا کہ الله نے نبی صلى الله عليه وسلم کو قرآن کے علاوہ کوئی علم، ہدایت، تنبیہ یا رہنمائی نہیں دی۔

اگر ایسا مان لیا جائے تو پھر :۔
عَلَّمَكَ مَا لَمْ تَكُنْ تَعْلَمُ (سورة النساء: 113)
وَأَنْزَلَ اللَّهُ عَلَيْكَ الْكِتَابَ وَالْحِكْمَةَ (سورة النساء: 113)
إِذْ يُوحِي رَبُّكَ إِلَى الْمَلَائِكَةِ (سورة الأنفال: 12)
جیسے تمام مقامات کا کوئی مطلب ہی نہ رہے۔

اصل بات یہ ہے کہ قرآن کتاب ہے اور سنت نبی کی عملی تشریح اور اطلاق ہے۔ قرآن کہتا ہے کہ نبی پر کتاب بھی اتاری گئی اور حکمت بھی :۔
وَأَنزَلَ اللَّهُ عَلَيْكَ الْكِتَابَ وَالْحِكْمَةَ (سورة النساء: 113)
یہ حکمت قرآن سے باہر نبی کی وہ تعلیم اور رہنمائی ہے جو الله کی دی ہوئی بصیرت سے آپ نے امت کو سکھائی۔

لہٰذا آپ کی پیش کردہ آیت قرآن کی عظمت کو بیان کرتی ہے، مگر یہ نتیجہ کہ “قرآن کے علاوہ کچھ نہیں دیا گیا” خود قرآن کے باقی حصوں سے ٹکرا جاتا ہے۔​