- Joined
- Jun 13, 2015
- Posts
- 15,129
- Reaction score
- 52,625
- Points
- 113
''نجکاری والا ۔۔۔۔۔۔ نجکاری والا ۔۔۔۔۔۔ ادارے لے لو ۔۔۔۔۔۔ سستے لے لو ۔۔۔۔۔۔ نجکاری والا۔۔۔۔۔۔ خسارے میں چلنے والے ادارے۔۔۔۔۔۔ تباہ حال بے کار ادارے ۔۔۔۔۔۔ سستے لے لو ۔۔۔۔۔۔ ادارے لے لو۔۔۔۔۔۔ پانچ روپے ۔۔۔۔۔۔ پانچ روپے ۔۔۔۔۔۔ پانچ روپے ''
''اے بھائی رکو تو ۔۔۔۔۔۔ کہو کون کون سے ادارے ہیں ؟''
'' بہن جی ۔۔۔۔۔۔ سب خسارے سے چلنے والے ادارے ہیں ۔۔۔۔۔۔ سمجھو پاکستان کے سارے ہی ادارے بیچتا پھر رہا ہوں'
'
''اچھا بھیا ۔۔۔۔۔۔ پھر کوئی اچھے سستے ادارے ہی دکھا دو ۔۔۔۔۔۔ ساتھ ادرک اور دھنیا مفت دو گے تو ادارے خریدوں گی''
'' ارے بہن جی ۔۔۔۔۔۔ ادرک دھنیے کے ساتھ ساتھ اداروں کے چئیرمین بھی فری میں دوں گا ۔۔۔۔۔۔ تم ادارے تو دیکھو''
''بھیا تم باتیں بہت کرتے ہو ۔۔۔۔۔۔ اب دکھا بھی دو ادارے ۔۔۔۔۔۔ دوپہر ہونے کو آئی ہے ۔۔۔۔۔۔ کس وقت گھر جاؤں گی اور کب ہانڈی روٹی کروں گی'
''اچھا میری بہن ناراض کیوں ہوتی ہے ۔۔۔۔۔۔ یہ دیکھ پہلا ادارہ ۔۔۔۔۔۔ یہ پاکستان ریلوے ہے ۔۔۔۔۔۔ بہت سستا ۔۔۔۔۔۔ صرف پانچ روپے''
''ارے اتنا سستا ۔۔۔۔۔۔ کیوں مذاق کرتے ہو''
''بہن ۔۔۔۔۔۔ بیچیں گے نہیں تو آگے قرضے کیسے ملیں گے ۔۔۔۔۔۔ لگتا ہے تم اخبار نہیں پڑھتیں''
''اچھا چلو کچھ اور بھی دکھا دو''
''یہ دیکھو بہن ۔۔۔۔۔۔ یہ ہے پی ٹی وی ۔۔۔۔۔۔ ساتھ میں ایم ڈی فری دوں گا ۔۔۔۔۔۔ ''
''ارے اتنا سستا ۔۔۔۔۔۔ کیوں مذاق کرتے ہو'' پی ٹی وی بیچو گے تو اپنی مشہوری کیسے کرو گے؟''
''بہن دیکھو ۔۔۔۔۔۔ ادارہ بیچ کر پیسہ ، منافع اور کمیشن کمائیں گے، آئی ایم ایف سے قرضے الگ سے ڈیمانڈ کریں گے اور جب سارے صحافی، اخبار نویس، اینکرز، میڈیا مالکان ہماری جیب میں ہیں تو پھر ہم پی ٹی وی کا ڈھول کب تک گلے میں ڈالے گھومتے رہیں''
''ارے واہ بھیا ۔۔۔۔۔۔ بہت سیانے کوے نکلے تم تو ۔۔۔۔۔۔ چلو ایک یہ بھی دے دو ۔۔۔۔۔۔ اور کیا کیا مال ہے''
''اچھا بہن ۔۔۔۔۔۔ اب سب سے بڑھیا مال دکھاتا ہوں ۔۔۔۔۔۔ یہ رہی پاکستان سٹیل مل ۔۔۔۔۔۔ انتہائی سستے دام ہیں ۔۔۔۔۔۔ اس کی صرف زمین ہی زمین اربوں روپے کی ہے اور میں زمین بمعہ عمارت اور پروڈکشن سب کچھ اونے پونے داموں میں دے رہا ہوں''
''ارے اس قدر مہنگی چیز تمھارے ہاتھ لگی کیسے''
'' بہن ۔۔۔۔۔۔ اندر کی باتیں مت اگلواؤ ۔۔۔۔۔۔ بس خرید لو ۔۔۔۔۔۔ جب اللہ کی ''منشاء'' ہی ہمارے حق میں ہے تو بس پھر تیری میری کیا ۔۔۔۔۔۔ سب اپنا ہی ہے''
''اچھا بھیا مان لیا کہ بہت سمارٹ ہو، اسی لیے تو تین سال سے ادارے بیچ رہے ہو مگر ابھی تک کسی کے ہاتھ نہیں آئے ۔۔۔۔۔۔ چلو اب کچھ اور دکھا دو جلدی سے''
'' بہن ۔۔۔۔۔۔ بس مال ختم ہو گیا ۔۔۔۔۔۔ یہ آخری چیز رہ گئی ہے ۔۔۔۔۔۔ یہ دیکھو اور اپنی قسمت پر ناز کرو کہ اگر یہ اتنی سستی مل جائے ۔۔۔۔۔۔ پی آئی اے ۔۔۔۔۔۔ صرف پانچ روپے''
''ارے اس قدر سستی ؟ ۔۔۔۔۔۔ یقین نہیں آتا ۔۔۔۔۔۔ لیکن ان ہزاروں ملازمین کا کیا ہوگا جو بہتر مستقبل کا خواب آنکھوں میں لیے پی آئی اے کی ترقی کا خواب دیکھ رہے ہیں؟''
''ارے بہن ۔۔۔۔۔۔ ملازمین کا فکر ہم کیوں کریں ۔۔۔۔۔۔ ہمارے بچے مر گئے ہیں جو پرائے بچوں کی فکر کریں ۔۔۔۔۔۔ اور نہیں بیچیں گے تو ہمارے دوستوں کی ذاتی ائر لائنز کیسے کامیاب ہوں گی ؟ اور آئی ایم ایف سے قرضے کیسے ملیں گے؟ ''
''اے لو ۔۔۔۔۔۔ اگر یہ ادارہ بک گیا تو ملک کیسے چلے گا ؟ یہ ادارہ تو ہمارا فخر ہے ۔۔۔۔۔۔ ہماری پہچان ہے ۔۔۔۔۔۔ آخر اس کو بیچنے کی وجہ ہی کیا ہے اور وہ بھی صرف پانچ روپے یعنی آلو کے بھاؤ ''
''دیکھو بہن ۔۔۔۔۔۔ پاکستان سے ہمارا کیا لینا دینا ۔۔۔۔۔۔ جن کا ملک ہے وہ جانیں اور پاکستان جانے ۔۔۔۔۔۔ ہمارا روپیہ، پیسہ، کاروبار، اولاد، جائیداد ۔۔۔۔۔۔ ہر چیز پاکستان سے باہر ہے ۔۔۔۔۔۔ ہم ادارے بیچ کر ہم منافع کمیشن اور قرضے بٹور کر ایک دو سال میں یہاں سے نکل جائیں گے ۔۔۔۔۔۔ پھر تم جانو اور تمھارا پاکستان''
'' لیکن ۔۔۔۔۔۔ بھیا ۔۔۔۔۔۔ ''
'' ارے بہن تم بولتی بہت ہو ۔۔۔۔۔۔ مال خریدنا ہے تو خریدو ورنہ اگلی ریڑھی دیکھو ۔۔۔۔۔۔ اس قدر سستا مال دے رہا ہوں اور تم ہو کہ بحث ختم کرنے کا نام نہیں لے رہی''
''اچھا بھیا ۔۔۔۔۔۔ ناراض کیوں ہوتے ہو ۔۔۔۔۔۔ سب کچھ جلدی سے دے دو اور بتاؤ کتنے روپے بن گئے؟''
'' پانچ روپے ''
'' صرف پانچ روپے ؟؟ یقین نہیں آتا ۔۔۔۔۔۔ چلو جلدی سے سارا سودا دے دو ''
''ہاں بہن ۔۔۔۔۔۔ سب کچھ پانچ روپے کا ہے ۔۔۔۔۔۔ اس سے بڑھ کر کسی چیز کی قیمت نہیں ہے ۔۔۔۔۔۔ ہم تجربہ کار لوگ ہیں ۔۔۔۔۔۔ قیمت ایسی رکھتے ہیں کہ سامنے والا قیمت چکائے بغیر جا ہی نہیں سکتا ۔۔۔۔۔۔ یہ لو بہن اپنا سودا اور میں چلا''
.
تحریر: عاشورعاصم





