Advertisement

میری اماں کی سلائی مشینیں اور مرغیاں اور میرا پچھتاوا

0a9eb80ce701553b2600a518067a2de6--sewing-machine-cabinets-old-sewing-machines.jpg


میری اماں کی سلائی مشینیں اور مرغیاں اور میرا پچھتاوا
نورالہدیٰ شاہ

noor-ul-huda-shah-6.jpg


زندگی جب اپنے اختتام کی طرف رُخ موڑتی ہے، تو پچھتاوا نہ صرف ساتھ ساتھ چلنا شروع کرتا ہے بلکہ مسلسل بولنے بھی لگتا ہے۔ دیکھا، کہا تھا نا کہ ایسا مت کر۔ کتنا روکا تھا۔ ایسا نہ کیا ہوتا تو آج یوں نہ ہوتا اور اگر ویسا کیا ہوتا تو آج کچھ یوں ہورہا ہوتا۔ عورت کو عموماً زندگی کے آخری اسٹیج پر ماں کی نصیحتیں یاد آیا کرتی ہیں۔ ماں اپنے تجربے کا نچوڑ بیٹی کو جہیز میں دینا چاہتی ہے مگر زندگی کی تجربہ گاہ میں داخل ہوتی بیٹی وہ فرسودہ تجربہ قبول کرنے سے انکار کردیتی ہے۔ بہت ساری زندگی گزارنے کے بعد کہیں جاکر انکشاف ہوتا ہے کہ زندگی ہے ہی فرسودہ چیز! اسے فرسودگی سے گزارو تو مزے میں گزرتی ہے۔ مختلف راستہ پکڑو تو آگے کی کوئی گارنٹی نہیں!

میری اماں کمال کی آرٹسٹ تھیں۔ رنگوں سے کھیلنے کا فن انہیں کڑھائی کی صورت آتا تھا۔ میں نے آنکھ کھولی تو اپنے گھر میں سنگر سلائی مشین سے لے کر ہر دور کی جدید ترین سلائی مشینیں دیکھیں۔ ہر سال حج کا سفر ہماری زندگی کا حصّہ تھا ہی، مگر واپسی پر جدہ میں چند دن رہ کر جدید جرمن سلائی مشینوں کی بڑی بڑی دکانوں کی زیارت کیے بغیر ہمارا سفرِ حج گویا مکمل ہی نہ ہوتا تھا!

میری بہت ہی ابتدائی یادوں کے منظر میں پیروں سے چلنے والی وہ سلائی مشین ہے، جس کا سائیکل جیسا سیاہ پہیا، پیڈسٹل چلاتے اماں کے پیروں کی رفتار کے ساتھ گھوما کرتا تھا۔ اماں اس پر جھکی بڑی بڑی چادریں کاڑھا کرتی تھیں۔ رنگ برنگی پھول پتے۔ بیل بوٹے۔ پھولوں تلے بچھی ہوئی سبز گھاس۔ پس منظر میں سفید دھاگے سے بنے بادل۔ مشین پر ان کے پیر تیز تیز چل رہے ہوتے تھے اور کئی رنگوں کے دھاگوں کی ریلیں، ان کے ارد گرد جیسے رقص کررہی ہوتی تھیں۔


مجھے مشین کا وہ اسٹینڈ اُس کم عمری میں بہت ہی پسند تھا۔ مگر میرا چھوٹا سا ذہن تصور ہی تصور میں اس اسٹینڈ کو رائٹنگ ڈیسک کی صورت دیکھتا تھا۔ میں سوچا کرتی کہ اگر اس پر سے مشین ہٹا لی جائے تو اس پر کاپی رکھ کر لکھا جاسکتا ہے! پھر اس کے بعد کئی جدید مشینیں آئیں۔ اماں نے وہ اسٹینڈ چھوڑ کر جدید اسٹینڈ بنوا لیے۔ اب وہ بجلی سے چلنے والی جرمن مشینیں لینے لگی تھیں۔ پرانا اسٹینڈ جو گھر کے ایک کونے میں پڑا رہ گیا تھا، میرا پہلا رائٹنگ ڈیسک بنا۔

یہاں سے میرے اور اماں کے بیچ اختلافِ رائے شروع ہوا۔ اماں مجھے اپنا کڑھائی کا فن دینا چاہتی تھیں۔ اور میں ایک نمبر کی نا خلف اولاد نکلی۔ سلائی کڑھائی مجھے چھوُ کر بھی نہ گزری تھی۔ شروع میں تو انہیں پتہ ہی نہ چلا کہ میں اسکول کی کاپیوں میں چھپا کر کیا کارستانیاں کرتی ہوں۔ مگر جب راز فاش ہوا تو انہوں سے سر پیٹ لیا۔ مگر تب تک خاصہ وقت گزر چکا تھا اور میں لکھنے کی عادی مجرم بن چکی تھی۔ اور اماں مشین پر کڑھائی کرنے کے بجائے، اپنے ہاتھوں سے شیفون کے دوپٹوں پر بڑی ہی نازک نفیس کڑھائی کرنے لگی تھیں۔

ان کے دوپٹوں کے کناروں پر ریشم کے دھاگوں سے نفیس سی بیلیں بنی ہوتیں، جنہیں وہ خود ڈزائین کرتی تھیں۔ لوگ ان کے دوپٹوں کو چھوُ کر دیکھا کرتے تھے اور حیران ہوتے تھے۔ مگر مشین کو انہوں نے چھوڑا نہیں۔ اسی سال سے اوپر کی عمر تک وہ اپنے کپڑے اپنی جرمن مشین پر سیا کرتی تھیں۔ اس کے آٹو میٹک ڈزائننگ سسٹم پر اپنی شلواروں کے پائنچے بناتیں۔ اس دوران میرا لکھنے کا جرم حدیں پار کرچکا تھا۔


مجھ میں اور اماں میں اپنے اپنے فن کے معاملے میں ایک عادت مشترک ہوئی۔ اماں اپنے سلے ہوئے کپڑے بار بار ادھیڑا کر نئے سرے سے سیتی تھیں اور مطمئن نہیں ہوتی تھیں۔ اور میں لکھ لکھ کر صفحے پھاڑ کر یا مروڑ کر پھینکتی جاتی اور دوبارہ لکھنے لگتی۔ اماں کے ارد گرد رنگ برنگے دھاگوں اور کترنوں کا ڈھیر بکھرا ہوا ہوتا اور میرے ارد گرد ادھ لکھے کاغذوں کے پرزے اور مروڑے ہوئے گولے۔ اب وہ جان گئی تھیں کہ ان کی بیٹی کیا کر رہی ہے! بڑے دکھ سے کہا کرتیں۔ نورالہدیٰ تھوڑی سی سلائی کڑھائی بھی سیکھ۔ ۔ ۔ ۔ یہ کاغذ اور جھوٹی کہانیاں تیرے کام نہیں آئیں گی۔ ۔ ۔ کچھ اپنا ہنر ہاتھ میں ہوگا تو زندگی آسان گزرے گی ۔ ۔ ۔ ہنر سیکھ ہنر ۔ ۔ ۔ میرے پھاڑ کر پھینکے ہوئے کاغذ دیکھ کر کہا کرتیں کہ ۔ ۔ ۔ یہ کاغذ نہیں پھاڑ رہی تو ۔ ۔ ۔ پیسے ہیں ۔ ۔ ۔ جنہیں پھاڑ پھاڑ کر پھینک رہی ہے تو ۔ ۔ ۔

اور میرا حال یہ تھا کہ مجھے چھوٹا سا ٹانکا لگانا بھی نہ آیا ۔ ۔ ۔ اوپر سے وہ دن قیامت سے کم نہ ہوتا تھا جس دن میرے درزی کا بل آتا تھا۔ ہر بار بل کی ادائگی سے پہلے مجھے اپنے پھوہڑ پنے پر ایک لیکچر سننا ہوتا تھا کہ ایک وقت آئے گا جب یہ موئے درزی بھی نہیں رہیں گے ۔ ۔ ۔ اپنا ہنر ہوگا تو کام آئے گا ۔ ۔ ۔ وہ انسان ہی کیا جو اپنے تن کے کپڑے بھی نہ سی سکے۔

مگر میں ان کی مرضی کی نہ بن سکی۔ میرے لیے جو بھی خواب انہوں نے دیکھے تھے، ایک بھی پورا نہ ہوا مجھ سے۔ میرے لکھنے کے ہنر نے میرا رخ میڈیا کی طرف موڑ دیا۔ تب میں نے بڑے فخر سے سوچا کہ یہ ہے میرا ہنر جو مجھے پیسہ کما کر دے رہا! مگر اب! اچانک پچھتاوے نے مجھے گھیر لیا ہے۔

میڈیا موئے پر برا وقت آیا ہوا ہے۔ تنخواہ رکی ہوئی ہے۔ لاکھوں کس کام کے اگر پرس میں نہیں۔ اوپر سے سلائی مشینوں کے کاروبار کی شہرت نے مجھے ڈپریشن میں ڈال دیا ہے۔ کاش اماں کا کہا مانا ہوتا۔ سلائی کڑھائی کا ہنر سیکھا ہوتا۔ اماں کی سلائی مشینوں کی اہمیت کو سمجھا ہوتا۔ آج میں کہاں کھڑی ہوتی! پاکستان سے امریکہ تک پھیلا ہوا ہوتا میرا کاروبار!
بات اس ایک پچھتاوے پر بھی ختم نہیں ہوتی۔ اماں کو میرے بہت ہی بچپن میں مرغیاں پالنے کا بھی شوق ہوا تھا


304-Hayata.jpg



یہ ساٹھ کی دہائی کا زمانہ تھا۔ وحدت کالونی لاہور کے سرکاری گھر کے کشادہ صحن میں کٹ کٹ کرتی دوڑتی پھرتی مرغیاں آج کل رہ رہ کر یاد آتی ہیں۔ ہمارے ساتھ والے گھر میں بہت ہی انٹلیکچوئل لوگ رہتے تھے۔ ارشاد حسین کاظمی اس وقت کے صحافی تھے۔ بڑی بہن پائلٹ اسکول کی پرنسپل تھیں اور چھوٹی بہن نرگس اماں کی گہری دوست ہوئیں۔ نرگس باجی نے ہی مجھے پہلی بار قلم پکڑنا اور لکھنا سکھایا۔ مگر جانے کیا سوچ کر وہ میری اماں کو مرغیوں کے کاروبار کی طرف لے آئیں۔
بہت ہی بڑا دڑبا بنوایا گیا، جس میں چار آدمی آرام سے ٹانگیں لمبی کرکے سو جائیں! آناً فاناً اس پنجرے میں مرغیاں بھی آباد ہوگئیں۔ نرگس باجی دیوار کے اُس طرف کھڑے ہوکر کسی ماہرِ مرغبان کی طرح مرغیوں کی پرورش کے لیے اماں کو ٹریننگ دیا کرتی تھیں۔ مرغیوں کا نان نفقہ طے کرتیں۔ انڈوں کی افزائش کا طریقہ سمجھاتیں۔ اماں ان کی ہدیات پر عمل کرتی جاتیں۔ تب مجھے پہلی بار پتہ چلا کہ مرغیوں کے لیے مرغا بھی چاہیے ہوتا ہے!
صحن بھر میں مرغیاں مرغے کے سنگ دوڑتی پھرتیں۔ مرغے کے آنے سے برکت بڑھی اور چھوٹے چھوٹے چوزوں کا بھی اضافہ ہونے لگا۔ چوزوں کی آمد والا وقت اماں اور نرگس باجی کے لیے بہت ہی اہم ہوتا تھا۔ اماں چوزوں کی آمد پر بطورِ خاص نگاہ رکھتیں۔ چوزے دنیا میں آجاتے تو اماں بڑے پیار سے ان ننھے ننھے سنہری رنگ چوزوں کو اپنے نفیس ہاتھوں میں اٹھاتیں۔ ان کے پروں کو پیار سے چھوتیں۔ دن بہ دن غور کرتیں کہ آج چوزے کتنے بڑے ہوئے ہیں! چوزوں کی معصومیت پر فدا ہوتیں۔

جذباتی ہوکر نرگس باجی کو بتاتی تھیں کہ یہ کس طرح ماں کے پروں تلے سمٹ کر بیٹھتے ہیں! کیسے ماں کو پہچانتے ہیں! اللہ کی قدرت کی تعریف کرتے نہ تھکتی تھیں۔ تخلیق کے اس نظام کو سراہتیں۔ اماں کو خدا سے براہِ راست باتیں کرنے کی عادت تھی۔ اس لیے یہ تعریف وہ براہِ راست آسمان کی طرف دیکھ کر کرتیں اور ایسے میں ان کی آنکھیں نم ہوجاتیں۔ مرغیوں اور ان کے چوزوں کی بلی سے حفاظت بھی ایک بڑا جوکھم تھا۔
ایک ملازم لڑکا اس پہرے پر مقرر تھا۔ مرغیاں دڑبے سے باہر چہل قدمی کے لیے بال بچوں سمیت نکلتیں تو پہریدار ان کے ساتھ ساتھ چل رہا ہوتا کہ کہیں بلی انہیں جھپٹ نہ لے۔ مگر میرا کند ذہن یہاں بھی نالائق ثابت ہوا! مجھے مرغیوں سے ڈر لگتا تھا۔ جونہی وہ دڑبے سے باہر آتیں، میں چیخنا شروع کردیتی۔ مجھے لگتا کہ یہ مجھے نوچ کھائیں گی۔ میری بھاگ دوڑ اور چیخ پکار سے صحن میں ایک افراتفری سی پھیل جاتی۔ مجھے لگتا کہ مرغیاں میرے پیچھے پڑی ہوئی ہیں اور مرغیوں کو لگتا کہ میں ان کے پیچھے پڑی ہوں۔
پہریدار الگ حواس باختہ ہوجاتا۔ یوں اس افراتفری میں، ایک دن ایک ننھا سا، سنہری رنگ چوزہ پہریدار لڑکے کے پیروں تلے آکر مرگیا۔ بہت ہی المناک منظر ہوا وہ! اماں کے آنسو کئی دن تک تھم نہ سکے۔ نرگس باجی بیچ کی دیوار پر کھڑے ہوکر اماں کی غمگساری کرتے ہوئے خود بھی آنسو بہاتیں۔ اس کے بعد بابا نے حکم دے دیا کہ اب اس گھر میں کوئی پرندہ نہیں آئے گا اور نہ پنجرہ بنے گا۔ میری بیٹی ڈرتی ہے ان سے۔ یوں مستقبل میں جو کاروبار میرے کام آتا، اس سے بھی میں محروم ہوئی۔

آج میڈیا کے ایک دفتر میں میڈیا پر فاتحہ پڑھتے ہوئے سوچا کرتی ہوں کہ کاش تھوڑی سی ہمت کرلیتی۔ آج والدین کی طرف سے مجھے سلائی مشینوں کے ساتھ مرغیوں کا کتنا بڑا کاروبار وراثت میں ملا ہوا ہوتا! ڈالرز میں آمدنی ہورہی ہوتی! نہ صرف حکومتِ وقت کو قرضہ دیتی بلکہ بڑی شان سے عدالتِ عالیہ میں پیش ہوکر میں بھی بتاتی کہ حضور! یہ کھربوں کا کاروبار مجھے والدین سے وراثت میں ملا ہے۔ یہ سلائی مشینیں، جن سے پورے ملک کا کاروبار چل رہا ہے اور یہ مرغیاں، جن سے پورے ملک کی بیروزگاری ختم ہونے جارہی ہے، میرا ہی تو ہے! مگر افسوس ایسا ہو نہ سکا! مجھے لکھنے کے علاوہ کوئی کام نہ آیا۔ اماں نے میری نالائقی دیکھ کر ضرور کچھ دعائیں کی ہوں گی، جو میرا زادِ سفر ہیں ابھی تک
​

 
Advertisement
کوٹ لکھپت جیل سے جمع شدہ کُوڑا اُٹھانے والی کچرا گاڑی کے مالک نے اپنی سروسز کے پیسے لینے سے انکار کردیا۔

ٹھیکدار کا کہنا ہے جس کُوڑے کو ہمارے عزیز از جان سابق وزیراعظم اور موجودہ چُوڑا اعظم نے اپنے مبارک ہاتھوں سے جمع کیا ہو اس کو یہاں سے لے جانے کے پیسے لینا میرے لیئے گناہ کبیرہ سے کم نہیں۔

دیکھ لو یہ ہوتی ہے اپنے لیڈر سوری چوُڑے سے محبت