مسلم لیگ ق کے رہنما مونس الہیٰ نے ایک بار پھر واضح کردیا کہ مستقبل میں بھی پی ٹی آئی کے ساتھ ہی رہنا چاہتے ہیں،عمران خان جو کہیں گے وہ ہوگا،یہ اٹل ہے،سابق وفاقی وزیر مونس الہیٰ نے وی لاگرز سے وزیر اعلی ہاؤس میں ملاقات کی۔
ملاقات کے دوران انہوں نے کہا مستقبل میں پی ٹی آئی کے ساتھ رہنا چاہتے ہیں،شاید کچھ لوگ نہیں چاہتے کہ ق لیگ پی ٹی آئی کے ساتھ رہے،عمران خان اور جنرل باجوہ ہمارے محسن ہیں ، ہم احسان فراموش نہیں ہیں۔
انہوں نے کہا نیشنل ہاکی اسٹیڈیم کے جلسے کے بعد والد پرویز الہیٰ کو تبدیل پایا،پرویز الہٰی عمران خان کے ساتھ دیر پاچلنے کے خواہاں ہیں،پرویز الہیٰ اورحسین الہیٰ مجھ سے مشاورت کرکےفیصلے کرتے ہیں،شجاعت حسین اور پرویز الہٰی کا رابطہ بحال ہوا ہے،عمران خان جو کہیں گے وہ ہوگا، یہ اٹل ہے۔
اس سے قبل بھی مونس الہیٰ عمران خان کا ساتھ دینے کا کہہ چکے ہیں، انہوں نے کہا تھا کہ عمران خان قوم کے حقیقی لیڈر ہیں، مدتوں بعد قوم کو ایسا رہنما نصیب ہوا ہے، ہر موقع پرعمران خان کا ساتھ دیں گے، وضع دار لوگ ہیں جس کے ساتھ چلتے ہیں تو ساتھ نبھاتے بھی ہیں۔
انہوں نے کہا تھا کہ پنجاب حکومت عمران خان کی امانت ہے، جب چاہیں واپس لے لیں، عوام کی خدمت کے لئے آئے ہیں، جب تک اللہ کو منظور ہوگا کام کریں گے،اپوزیشن کا جم غفیر عمران خان کو دیکھ کر کانپ رہا ہے، اپوزیشن والے خوفزدہ ہیں کہ عمران خان اب کیا کرنے والے ہیں، اسمبلیوں سے استعفے دئیے تو بھی اپوزیشن کا حکومت بنانے کا خواب ادھورا ہی رہے گا۔
Advertisement





