Advertisement

اگر آئین پر عمل ہی نہیں کرنا تو ملک میں مارشل لاء لگادیں،فواد

148740_FawadChaudhryarrest_1674623901142.jpg

پاکستان تحریک انصاف کے مرکزی رہنما فواد چوہدری کا کہنا ہے کہ ہم نواز شریف کی نااہلی کیسے ختم کرسکتے ہیں تاہم وہ واپس آئیں اور الیکشن لڑیں ہمیں کوئی اعتراض نہیں ہوگا۔

تفصیلات کے مطابق پی ٹی آئی کے ہیڈ آف میڈیا افیئرز فواد چوہدری نے نجی ٹی وی چینل ہم نیوز کے پروگرام پاکستان ٹونائٹ میں خصوصی گفتگو کرتے ہوئے کہا کہ نواز شریف نے شرط رکھی ہے کہ پہلے عمران خان کو نااہل کروایا جائے، جنرل باجوہ امریکہ کے بڑے سپورٹر تھے انہوں نے عمران خان کو بہت سے فارمولے دیئے۔


انہوں نے مزید کہا کہ پہلے عامر ڈوگر کو گرفتار کیا گیا اب یہ حکومت سابق وزیر خزانہ کو گرفتار کرنے کی تیاری کررہی ہے، شوکت ترین اس وقت بیمار ہیں اور ایک مہینے سے بیرون ملک مقیم ہیں۔

فواد چوہدری نے کہا کہ خود یہ لوگ بازار میں بیٹھ کر کھانا کھانے کے قابل بھی نہیں رہے، رانا ثناء اللہ سمجھتے ہیں کہ وہ لاٹھی اور گولی کی حکومت چلالیں گے،رانا ثناء اللہ نے نواز شریف اور آصف علی زرداری کا نام سیاست رکھا ہوا ہے، آئین و قانون کو تو یہ لوگ پہلے ہی کچھ نہیں سمجھتے ہیں، انہوں نے اس ملک کو برباد کرکے اپنی سیاست دفن کردی ہے۔


رہنما پی ٹی آئی نے کہا کہ اگر ملک میں انتخابات نہیں ہوتے تو آئین کی بحالی کی تحریک چلائیں گے، اگر آئین پر عمل ہی نہیں کرنا تو ملک میں مارشل لاء لگادیں، ہم کل الیکشن کمیشن اور گورنر کے خلاف عدالت جائیں گے، الیکشن کمیشن کو اپنا اجلاس کل کے بجائے آج طلب کرنا چاہیے تھا، جو ان کے حالات ہیں یہ تو 2025 میں بھی انتخاب نہیں کروائیں گے۔

اس سے پہلے مائیکروبلاگنگ ویب سائٹ ٹویٹر پر رہنما پی ٹی آئی فواد چوہدری کا کہنا تھا کہ مریم نواز شریف نیب ترامیم پر عدالتی فیصلے سے قبل عدلیہ پر بے جا تنقید کرکے دباؤ بڑھانا چاہتی ہیں، انہیں یہ خوف ہے کہ کہیں عدالت نیب ترامیم کو کالعدم قرار نا دے دے۔

Loading X post…
Open original post on X

فواد چوہدری نے کہا کہ مریم نواز کو خوف ہے کہ اگر نیب ترامیم کالعدم قرار دیدی گئیں تو رجیم چینج کا سارا مقصد ہی ختم ہوجائے گا اور تمام مقدمات دوبارہ سے بحال ہوجائیں گے، یہ عدلیہ پر اثر انداز ہونے کی مریم نواز کی ایک بہیمانہ کوشش ہے۔