آسٹریلوی لیجنڈری لیگ اسپنر شین وارن 52 سال کی عمر میں دل کا دورہ پڑنے سے انتقال کرگئے ہیں۔
تفصیلات کے مطابق مایہ ناز لیگ اسپنر شین وارن تھائی لینڈ کے علاقے کو ساموی میں اپنے ولا میں مردہ حالت میں پائےگئے۔
وارن کی مینیجمنٹ کمپنی کی جانب سے ایک مختصر بیان میں تصدیق کی گئی کہ وہ تھائی لینڈ کے کوہ ساموئی میں دل کا دورہ پڑنے سے انتقال کر گئے، میڈیکل ٹیم نے انہیں بچانے کی پوری کوشش کی لیکن وہ جانبر نہ ہوسکے، شین وارن نے اپنے پسماندگان میں تین بچے چھوڑے ہیں۔
شین وارن کو کرکٹ کھیلنے والے عظیم ترین باؤلرز میں شمار کیا جاتا ہے، شین وارن کا شاندار بین الاقوامی کیریئر 15 سالوں پر محیط تھا اور 145 ٹیسٹ میں 708 وکٹیں حاصل کیں جو کسی بھی آسٹریلوی کرکٹر کی اب تک کی سب سے زیادہ وکٹیں ہیں۔
یہ آسٹریلوی کرکٹ کیلئے 24 گھنٹوں کے اندر دوسری بری خبر ہے، آج صبح ہی سابق آسٹریلوی وکٹ کیپر روڈ مارش بھی دل کا دورہ پڑنے سے انتقال کر گئے تھے۔
شین وارن نے اپنے ٹوئٹر اکاؤنٹ پر آج صبح آخری سرگرمی میں سابق کرکٹر روڈ مارش کی وفات پر تعزیت کی تھی۔ سابق کرکٹر کے اہلخانہ سے تعزیت کرتے ہوئے انہوں نے روڈ مارش کی کرکٹ خدمات کو شاندار الفاظ میں خراج تحسین پیش کیا تھا۔
سوشل میڈیا شین وارن کی چند گھنٹے پہلے کی گئی پوسٹ پر اظہار افسوس بھی کر رہے ہیں۔
دوسری جانب شین وارن کے انتقال پر کرکٹرز کی جانب سے اسے کرکٹکی دنیا کا نقصان قرار دیتے ہوئے تعزیتی پیغامات کا سلسلہ جاری ہے۔
قومی کرکٹ ٹیم کے سابق فاسٹ باؤلر شعیب اختر نے کی اچانک موت پر افسردگی کا اظہار کیا، شعیب اختر نے اپنے ساتھ ان کی ایک تصویر شیئر کرتے ہوئے لکھا کہ ’اپنی افسردگی کو بیان نہیں کر سکتا۔‘
قومی کرکٹ ٹیم کے کپتان بابر اعظم نے بھی شین وارن کی موت پر اظہار افسوس کیا ہے۔
قومی کرکٹ ٹیم کے وکٹ کیپر بلے باز محمد رضوان نے بھی افسردگی کا اظہار کیا ہے۔
انڈین کرکٹر وریندر سہواگ نے شین وارن کے انتقال کی خبر کو ’ناقابل یقین‘ قرار دیتے ہوئے لکھا کہ زندگی بہت ہی نازک ہے لیکن کچھ چیزیں قبول نہیں کی جا سکتیں۔
