عیدالاضحیٰ کی تعطیلات کے دوران گڈو پاور پلانٹ میں آتشزدگی سے قومی خزانے کو 15 ارب روپے کا نقصان۔
تفصیلات کے مطابق عیدالاضحیٰ کی تعطیلات کے دوران گڈو پاور پلانٹ میں آگ لگنے کے باعث قومی خزانے کو 15 ارب روپے کا نقصان اٹھانا پڑا۔ ذرائع کا کہنا ہے کہ گڈو پاور پلانٹ میں آگ بجھانے کے آالات ہی موجود نہیں تھے جبکہ عیدالاضحیٰ کی وجہ سے آتشزدگی کے وقت عملہ چھٹی پر تھا۔
بتایا جا رہا ہے کہ گڈو پاور پلانٹ مکمل طور پر جل گیا ہے جس سے 747 میگاواٹ بجلی سسٹم سے نکل گئی ہے اور قومی خزانے کو 15 ارب روپے کا نقصان ہوا ہے جبکہ گڈو پاور پلانٹ سے بجلی بحال کرنے میں کئی ماہ درکار ہوں گے۔
چیف انجینئر گڈو پاور پلانٹ کی سربراہی میں 4 رکنی ٹیم نے آتشزدگی کی وجوہات کا تعین کرنے کیلئے تحقیقات شروع کر دی ہیں جبکہ سینئر انجینئر گڈو پاور پلانٹ کے مطابق طوفانی بارش کے باعث جنریٹرز میں پانی چلا گیا تھا، یہ اتفاقی حادثہ تھا یا وجہ کچھ اور تھی اس بارے چھان بین کی جا رہی ہے۔
سینئر انجینئر گڈو پاور پلانٹ کا کہنا تھا کہ پاور پلانٹ کی مکمل بحالی میں ایک ماہ لگ سکتا ہے، انہوں نے کہا کہ اتنا نقصان نہیں ہوا جتنا رپورٹ کیا جا رہا ہے، تحقیقات کے بعد ہی ذمہ داران کا تعین کریں گے۔ ہماری کوشش ہو گی کہ جلد از جلد گڈو پاور پلانٹ کا مکمل فعال کر دیا جائے۔
یاد رہے کہ گزشتہ سال 9 جنوری کو گدو پاور سٹیشن پر پاور ٹرپ اور بریک ڈاؤن ہونے سے ملک بھر میں بجلی متاثرہوئی تھی، یہ ملک کا طویل ترین بریک ڈاؤن تھا جو تقریباً گیارہ گھنٹے تک جاری رہا تھا اور ملک کے بیشتر شہروں میں بریک ڈاؤن کے باعث کئی گھنٹوں تک بجلی کی فراہمی معطل رہی تھی۔
بعد ازاں نیشنل الیکٹرک پاور ریگولیٹری اتھارٹی (نیپرا) نے ملک بھر میں بریک ڈاؤن کے حوالے سے تحقیقات کیں، جس میں انکشاف کیا گیا تھا کہ گڈو پاور سٹیشن میں یہ مسئلہ انسانی غلطی کی وجہ سے ہوا تھا، جس کے باعث مکمل بلیک آؤٹ ہوا۔
- Featured Thumbs
- https://www.siasat.pk/data/files/s3/12guddupwerplantfire.jpg
