انٹرنیٹ پر موجود دنیا کے سب سے بڑے سرچ انجن گوگل نے پاکستان میں اپنے دفاتر کھولنے کا فیصلہ کر لیا ہے۔ گوگل کی طرف سے بطور کمپنی سکیورٹیز اینڈ ایکسچینج کمیشن آف پاکستان (ایس ای سی پی) میں رجسٹریشن کروا لی گئی ہے جس کے بعد گوگل کی طرف سے جلد پاکستان میں دفاتر کھولے جائیں گے۔
گوگل کے بطور کمپنی پاکستان میں رجسٹر ہونے کے بعد وفاقی وزیر برائے انفارمیشن اینڈ ٹیکنالوجی سید امین الحق کا کہنا تھا کہ گوگل کی ایس ای سی پی میں رجسٹریشن ہونے کے بعد دیگر غیرملکی سوشل میڈیا پلیٹ فارمز کی طرف سے دفاتر کھولے جائیں گے۔
ان کا کہنا تھا کہ گوگل کے بعد سماجی رابطوں کے سب سے بڑے پلیٹ فارم فیس بک کے ساتھ بھی پاکستان بھر میں اپنے دفاتر کھولنے کے لیے بات چیت کی جا رہی ہے ، اس کے علاوہ سوشل میڈیا پلیٹ فارم ٹک ٹاک بھی جلد پاکستان میں اپنا دفتر کھولے گا۔
حکومت کی طرف سے عائد کیے گئے سوشل میڈیا رولز کے مطابق سوشل میڈیا کمپنیوں کو ایس ای سی پی میں رجسٹریشن کا پابند کیا گیا ہے جبکہ سرچ انجن گوگل کا سرور بھی پاکستان میں قائم کیا جائے گا جس سے ڈیٹا بھی محفوظ رہے گا اور اس کے بعد دیگر سوشل میڈیا پلیٹ فارمز کے دفاتر پاکستان میں کھولنے کی راہ بھی ہموار ہو جائے گی۔
یاد رہے کہ وفاقی وزیر برائے انفارمیشن اینڈ ٹیکنالوجی سید امین الحق نے چند دن پہلے پاکستان عوام کو خوشخبری سناتے ہوئے کہا تھا کہ گوگل کا دفتر جلد پاکستان میں کھل جائے گا جبکہ سوشل میڈیا پلیٹ فارم ٹک ٹاک بھی پاکستان میں جلد ہی اپنا دفتر کھول لے گا اور فیس بک سے بات چیت کی جا رہی ہے، رواں ماہ گوگل کا ایک وفد پاکستان کا دورہ کرے گا۔