دنیا کی مشہور ٹیکنالوجی کمپنی گوگل نے پاکستان میں زلزلے کی پیشگی آگاہی دینے والا سسٹم متعارف کروادیا ہے،یہ سسٹم قدرتی آفات خصوصا زلزلے کی بروقت آگاہی دینے کی اہلیت رکھتا ہے۔
میڈیا رپورٹس کے مطابق 2سال قبل متعارف کروائے گئے”گوگل الرٹ سسٹم ” کو دیگر ممالک کے بعد اب پاکستان میں بھی لانچ کیے جانے کی تیاری ہورہی ہے،اینڈرائیڈ موبائل فونز استعمال کرنے والے پاکستانی صارفین اب اس فیچر سے مستفید ہوسکیں گے۔
یہ الرٹ سسٹم بلاقیمت ہے اوراینڈرائیڈ پلیٹ فارم کا ایک مددگار فیچر ہے جو دنیا بھر میں زلزلوں کا پتا لگاتا اور لوگوں کو آگاہ کرتا ہے
گوگل الرٹ سسٹم بغیر کسی موبائل ایپلی کیشن کے از خود اینڈرائیڈ آپریٹنگ سسٹم والے موبائل فونز میں آپریٹ کرے گا اور بالکل ایسے نوٹیفکیشن دے گا جیسے صارفین کوکوئی ٹیکسٹ میسج موصول ہوتا ہے، تاہم یہ نوٹیفکیشن نمایاں ہوگا جس میں صارف کو قدرتی آفت سے متعلق آگاہی دی جائے گی۔
گوگل الرٹ سسٹم کو 2 مختلف اقسام میں تقسیم کیا گیا ہے، پہلی قسم4 سے ساڑھے 4 شدت کے زلزلے کیلئے استعمال کی جائے گی جس میں صارفین کو ہوشیار ہونے اور زلزلے کی شدت سے متعلق آگاہی دی جائے گی،جس میں صارفین کو اس صورتحال سے نمٹنے کیلئے مختلف تجاویز اور مشورے بھی دیئے جائیں گے۔
