بھارتی حکمران جماعت بی جے پی کے رہنما کی جانب سے گستاخانہ بیان کے بعد عرب ممالک نے بھارت کے بائیکاٹ کا اعلان کردیا ہے۔
خبررساں ادارے کی رپورٹ کے مطابق بھارتی جنتا پارٹی(بی جے پی) کی ترجمان نوپور شرما کے گستاخانہ بیان کے بعد دنیا بھر کے مسلمانوں کی جانب سے شدید ردعمل سامنے آریا ہے، عرب ممالک میں ترجمان بی جے پی کے بیان کے خلاف شدید احتجاج بھی شروع ہوگیا ہے۔
کویت میں مظاہرین نے احتجاج کرتے ہوئے بھارتی انتہا پسند حکومت کے وزیراعظم نریندر مود کی تصاویر کوڑے دانوں پر لگادیں۔
عوامی ردعمل کو دیکھتے ہوئے مختلف عرب ممالک نے بھارتی مصنوعات کے بائیکاٹ کا اعلان بھی کردیا ہے، عمان کے مفتی اعظم نے بھارت کے بائیکاٹ کا اعلان اپنے ٹویٹر اکاؤنٹ سے کیا اور کہا کہ ہندوستان میں حکمران انتہا پسند جماعت کے سرکاری ترجمان کی جانب سے پیغمبر اسلام صلی اللہ علیہ وسلم اور ان کی پاکیزہ بیوی ام المومنین عائشہ رضی اللہ عنہا کے خلاف گستاخانہ اور قابل مذمت بیان پر مشرق و مغرب کے مسلمانوں کے خلاف اعلان جنگ ہے۔
انہوں نے مزید کہا کہ یہ ایک ایسا معاملہ ہے جو پوری دنیا کے مسلمانوں سے ایک متحد قوم بن کر کھڑے ہونے کا مطالبہ کرتا ہے۔
عرب ممالک سمیت دنیا بھر کے مسلمانوں کی جانب سے شدید ردعمل سامنے آنے کے بعد بھارتی جنتا پارٹی نے نوپور شرما کی رکنیت معطل کردی ہے۔