پاکستان اور نیوزی لینڈ کی ٹیموں کے مابین کھیلے جانے والے دوسرے ٹیسٹ میچ کے پہلے روز کیوی فاسٹ باؤلر نے پچ پر طنز کرتےہوئے اسے سڑک قرار دیدیا ہے۔
تفصیلات کے مطابق کراچی میں آج پاکستان اور نیوزی لینڈ کی ٹیموں کے مابین دوسرا ٹیسٹ میچ شروع ہوا ، میچ کے پہلے دن نیوزی لینڈ نے 6 وکٹوں کے نقصان پر 309 رنز بنالیے۔
نیوزی لینڈ کے فاسٹ باؤلر مچل میکینگن نے کھیل کیلئے تیار کی گئی پچ پر طنز کرتے ہوئے ٹویٹ کیا اور کہا کہ" کیا زبردست سڑک ہے، یہ تو بیٹسمینوں کا خواب ہوتا ہے"۔
خیال رہے کہ چیف سیلکٹر شاہد خان آفریدی نے دو روز قبل اپنے ایک بیان میں کہا تھا کہ دوسرے ٹیسٹ میچ کیلئے باؤنسی وکٹ تیار کرنے کی کوشش کریں گے تاکہ تماشائیوں کو میچ دیکھنے میں مزہ آسکے، جن پچز پر ہم نے کھیلا ہے اس سے باؤلرز کو کافی نقصان ہوسکتا ہے۔
ایسی پچز پر کسی بھی طرح کرکٹ کو فائدہ نہیں ہوگا، انگلینڈ اور نیوزی لینڈ کے خلاف سیریز کے دوران جو پچز استعمال کی گئیں ان سے ہماری کرکٹ کبھی آگے نہیں جاسکےگی۔
