تحریک انصاف کے رہنماؤں نے مریم نواز شریف کی جانب سے سابقہ حکومت کے آئی ایم ایف سے معاہدے کے بعد پیٹرول کی قیمت300 روپے تک ہونے سے متعلق بیان پر ردعمل دیدیا ہے۔
تفصیلات کے مطابق مسلم لیگ ن کی نائب صدر مریم نواز شریف نے ایک بیان میں کہا کہ گزشتہ حکومت کے آئی ایم ایف سے معاہدے کے مطابق آج پیٹرول کی قیمت 300 روپے فی لیٹر ہونی چاہیے تھی،اگر حکومت نے آئی ایم ایف پروگرام کی پاسداری نہ کی تو پاکستان دیوالیہ ہوسکتا ہے۔
مریم نواز شریف کے اس بیان پر ردعمل دیتے ہوئے سابق وفاقی وزیر اطلاعات فواد چوہدری نے کہا کہ اگر تحریک انصاف کو دوبارہ حکومت ملی دوبارہ تیل اور بجلی کی قیمتی کم کریں گے،ملک چلانا کوئ پرائیویٹ انڈسٹری چلانا نہیں ہے۔
انہوں نے مزید کہا کہ معاشی ترقی کیلئے انرجی کا سستا ہونا انتہائی اہم ہے آپ جیسے جاہل جو حکومتی اخراجات پر قابو نہی پا سکتے وہ توانائی کی قیمتوں میں اضافے کو معاشی حکمت عملی سمجھتے ہیں۔
رہنما تحریک انصاف ڈاکٹر ارسلان خالد نے کہا کہ مریم نواز شریف کا کہنا ہے کہ ہم نے 2019 میں آئی ایم ایف سے پیٹرولیم مصنوعات کی قیمتوں میں اضافے کا معاہدہ کیا،اگر واقعی ایسا ہے تو ہماری حکومت نے 3 سال تک آئی ایم ایف کی شرائط کے برخلاف پیٹرول کی قیمت کو کیسے مستحکم رکھا اور ٹیکس ہدف بھی پورا کیا، جھوٹا اسکرپٹ تو کم ازکم کام کا لکھوالو۔
سابق حکومت میں ترجمان وزارت خزانہ مزمل اسلم نے لکھا کہ کیا مریم نواز شریف جان بوجھ کر اپنی حکومت کو گنداکرتی ہیں؟