پاکستان اور بنگلہ دیش کے درمیان کراچی میں 30 اگست سے شروع ہونے والے ٹیسٹ میچ میں تماشائیوں کو اسٹیڈیم میں آنے کی اجازت نہیں ہوگی۔
تفصیلات کے مطابق پاکستان کرکٹ بورڈ (پی سی بی) نے فیصلہ کیا ہے کہ 30 اگست سے 3 ستمبر تک پاکستان اور بنگلہ دیش کی ٹیموں کے درمیان کراچی کے نیشنل بینک کرکٹ اسٹیڈیم میں سیریز کا دوسرا ٹیسٹ میچ تماشائیوں کے بغیر ہی کھیلا جائے گا۔
کرکٹ بورڈ ذرائع کا کہنا ہے کہ یہ مشکل فیصلہ آئی سی سی چیمپیئنز ٹرافی 2025 کی تیاری کیلئے اسٹیڈیم میں ہونےوالے تعمیراتی کاموں کی وجہ سے کیا گیا ہے۔
اس حوالے سے کرکٹ بورڈ کی جانب سے جاری کردہ بیان میں کہا گیا ہے کہ شائقین کی قدر کرتے ہیں اہم ان کی صحت اور حفاظت ہمارے لیے انتہائی اہم ہے، یہ تعمیراتی کام چیمپیئنز ٹرافی کے دوران اسٹیڈیم میں بہترین سہولتیں فراہم کرنے کیلئے کیا جارہا ہے، اس ٹیٹسٹ میچ کی ٹکٹس کی فروخت معطل کردی گئی ہے، اگر شائقین کرکٹ ٹکٹس خرید چکے ہیں تو ان کی رقم واپس کردی جائے گی۔
خیال رہے کہ بنگلہ دیش کرکٹ ٹیم دو ٹیسٹ میچ کی سیریز کیلئے گزشتہ روز لاہور پہنچی تھی، پاکستان اور بنگلہ دیش کے درمیان پہلا ٹیسٹ میچ 21 اگست سے راولپنڈی میں شروع ہوگا۔
