مسلم لیگ ق کے سربراہ چوہدری شجاعت حسین نے وزیراعظم عمران خان کی جانب سیاسی قائدین کے نام بگاڑنے پر اپنے تحفظات کا اظہار کردیا ہے۔
خبررساں ادارے کی رپورٹ کے مطابق چوہدری شجاعت حسین کی جانب سے جاری بیان میں کہا گیا ہے کہ وزیراعظم عمران خان ہمیشہ ریاست مدینہ کی بات کرتے ہیں ، بہترہوتا وہ سورۃالحجرات کی آیت نمبر11کا ترجمہ پڑھ لیتے تو سیاسی قائدین کو برے ناموں اور القابات سے نہ نوازتے۔
چوہدری شجاعت حسین نے سورۃ الحجرات کی 11 کا ترجمہ بتایا: " اے ایمان والو! مرددوسرےمردوں کا مذاق نہ اڑائیں، ممکن ہے وہ ان سے بہتر ہوں اور نہ عورتیں دوسری عورتوں کا مذاق اڑائیں ممکن ہے وہ ان سے بہترہوں، آپس میں ایک دوسرے پر عیب نہ لگاؤ، اور نہ ہی کسی کو برے لقب دو،ایمان کےبعد فسق برا نام ہے،جو توبہ نہ کریں وہی لوگ ظالم ہیں"۔
سربراہ ق لیگ نے سیاستدانوں کو مشورہ دیتے ہوئے کہا کہ گفتگو کے دوران شائستگی اور رواداری کا دامن ہاتھ سے نہ چھوڑیں۔
واضح رہے کہ وزیراعظم عمران خان کی جانب سے اکثر جلسوں میں تقاریر اور خطابات کے دوران اپوزیشن جماعتوں کے سربراہوں کو مختلف ناموں سے پکارا جاتا ہے،وزیراعظم مولانا فضل الرحمان کو ڈیزل، شہباز شریف کو شوباز شریف جیسے ناموں سے پکارتے ہیں۔