سینئر سیاستدان جہانگیر ترین نے اپنے سیاسی گروپ کو مزید مضبوط بنانے کیلئے 3 رکنی خصوصی کمیٹی تشکیل دیدی ہے۔
تفصیلات کے مطابق جہانگیر خان ترین اپنے گروپ کو مزید مضبوط کرنے اور مزید لوگوں کو گروپ میں شامل کرنے کیلئے متحرک ہوگئے ہیں، اسی سلسلےمیں جہانگیر ترین نے تین رکنی خصوصی کمیٹی تشکیل دیدی ہے کمیٹی کو پاکستان تحریک انصاف چھوڑنے والے اور دیگر سیاسی رہنماؤں سے رابطوں کا ٹاسک دیا گیا ہے۔
سردار تنویر الیاس، عون چوہدری اور اسحاق خاکوانی پر مشتمل خصوصی کمیٹی پی ٹی آئی چھوڑنے اور دیگر سیاسی رہنماؤں کو ترین گروپ میں شامل ہونے کی دعوت دے گی، ذرائع کا کہنا ہے کہ سابق پی ٹی آئی رہنما علیم خان گروپ کے ارکان بھی جہانگیر ترین گروپ سے ملاقات کرچکے ہیں جبکہ فواد چوہدری اور فردوس عاشق اعوان بھی جہانگیر ترین گروپ سے رابطے میں ہیں۔
ذرائع کا دعویٰ ہے کہ جہانگیر ترین گروپ کی جانب سے سابق وزیراعلی خیبر پختونخوا پرویز خٹک سمیت دیگر سیاسی رہنماؤں کو بھی پارٹی میں شامل کرنے کیلئے رابطہ کیا جائے گا۔
