
ایچ بی ایل پاکستان سپر لیگ (پی ایس ایل) کے 10ویں سیزن کے پلیئرز ڈرافٹ کی تقریب لاہور کے تاریخی حضوری باغ میں منعقد ہوئی، جہاں ملک و بیرون ملک سے بہترین کرکٹرز کی شمولیت کا عمل مکمل ہوا۔ چھ فرنچائزز نے اس موقع پر اپنی ٹیموں کو مزید مضبوط بنانے کے لیے بہترین کھلاڑیوں کا انتخاب کیا۔
اس ڈرافٹ میں کئی عالمی شہرت یافتہ کھلاڑیوں کو مختلف ٹیموں میں شامل کیا گیا۔ آسٹریلیا کے ڈیوڈ وارنر اور شان ایبٹ، نیوزی لینڈ کے کین ولیمسن، ڈیرل مچل اور فن ایلن جیسی شخصیات پی ایس ایل 10 کا حصہ بن گئی ہیں، جو لیگ کی مسابقتی سطح کو مزید بلند کریں گی۔
تاہم، کئی مشہور کرکٹرز کو کسی بھی فرنچائز نے منتخب نہیں کیا، جن میں سسرفراز احمد، ٹم ساؤتھی، احسان اللہ، جیسن روئے، ایلکس ہیلز، مجیب الرحمان، ایشٹن ایگر، کرس لین، کوپر کانوولی، ڈینیل سیمز، جیسن بہرینڈروف، مارک اسٹیکیٹے، موئیسز ہینریکس، عثمان خواجہ، ولیم سدرلینڈ، مستفیض الرحمان، شکیب الحسن، جو کلارک، لوری ایونز، تیمال ملز، جمی نیشم، عمران طاہر، ریضا ہینڈرکس، تبریز شمسی، چرِتھ اسالنکا، ایون لیوس جیسے نام شامل ہیں۔ ان کھلاڑیوں کا شامل نہ ہونا مداحوں کے لیے حیرانی کا باعث بنا ہے۔
پی ایس ایل کے افتتاحی ایڈیشن کے بعد پہلی بار سرفراز احمد پلیئرز ڈرافٹ کا حصہ تھے، لیکن کسی ٹیم نے انہیں منتخب نہیں کیا۔ تاہم، کوئٹہ گلیڈی ایٹرز کے مالک ندیم عمر نے سرفراز احمد کی خدمات کو تسلیم کرتے ہوئے انہیں ٹیم کا کوچ مقرر کر دیا۔ سرفراز، جو کوئٹہ گلیڈی ایٹرز کے سابق کپتان رہ چکے ہیں، اب اپنی نئی ذمہ داریوں میں ٹیم کی تربیت اور حکمت عملی ترتیب دینے پر توجہ دیں گے۔