پاکستان پیپلزپارٹی کے رہنما ندیم افضل چن نے پنجاب میں پری پول دھاندلی کا الزام لگاتے ہوئے کہا ہے کہ تخت لاہور کی جنگ میں ہم بھی دعویدار ہیں۔
تفصیلات کے مطابق پاکستان پیپلزپارٹی کے رہنما ندیم افضل چن نے اسلام آباد میں فیصل کریم کنڈی کے ہمراہ پریس کانفرنس کی اور کہا کہ چیئرمین بلاول بھٹو زرداری اور شریک چیئرمین آصف علی زرداری جب لاہور میں بیٹھتے ہیں تو بہت سے لوگوں کو مروڑ اٹھتے ہیں۔
انہوں نے مزید کہا کہ اس وقت پنجاب میں پیپلزپارٹی مظلوم ہے، صوبے میں جو کام ہورہے ہیں وہ پری پول دھاندلی کے زمرے میں آتے ہیں، چیئرمین پیپلزپارٹی کی تقریر کے بعد جو طوفان برپا ہوا اس کی پرزور مذمت کرتے ہیں۔
ندیم افضل چن نے کہا کہ ہم الیکشن چاہتے ہیں مگر اسلامی جمہوری اتحاد والا الیکشن نہیں چاہتے، 90 کی دہائی جیسا الیکشن بھی نہیں چاہتے۔
رہنما پیپلزپارٹی کا مزید کہنا تھا کہ یہ تخت لاہور کی جنگ ہے اور ہم بھی اس تخت کے دعویدار ہیں۔
1737098126-0/sidra--(4)1737098126-0.png)
