وزیراعظم شہباز شریف پشاور پولیس لائن میں خود کش حملے کے معاملے پر آئی جی خیبرپختونخوا پر برہم ہوگئے ہیں۔
تفصیلات کے مطابق وزیراعظم شہباز شریف اور آرمی چیف جنرل عاصم منیر نے پشاور کا دورہ کیا، اس موقع پر وزیراعظم اور آرمی چیف نے دہشت گردی کے واقعہ میں زخمیوں کی لیڈی ریڈنگ ہسپتال میں عیادت کی۔
وزیراعظم شہباز شریف نے پولیس لائنز کی مسجد میں دہشت گردی کے واقعہ پر سخت برہمی کا اظہار کرتے ہوئے آئی جی خیبر پختونخوا معظم جاہ انصاری سے استفسار کیا کہ پولیس لائنز میں داخلے کا ایک ہی گیٹ ہے، حملہ آور کیسےپولیس لائنز کے اندر داخل ہوگیا؟
آئی جی خیبر پختونخوا نے جواب دیا کہ پولیس لائنز میں رہائشی کوارٹرز بھی موجود ہیں، کچھ نہیں کہا جاسکتا کہ حملہ آور کہاں سے پولیس لائنز میں داخل ہوا، یہ بھی ممکن ہے کہ حملہ آور پہلے سے ہی پولیس لائنز کے اندر رہ رہا ہو، پورے معاملے کی تحقیقات جاری ہیں۔
خیال رہے کہ پشاور کی پولیس لائن میں واقع مسجد میں نماز کے دوران خود کش دھماکہ ہوا ہے جس میں 32 افراد شہید جبکہ145 افراد زخمی ہیں،، شہید اور زخمی ہونے والوں میں پولیس اہلکار بھی شامل ہیں۔
