کرکٹ شائقین کا بخار ابھی پوری طرح اترا نہیں، گراؤنڈ فیلڈ سے کھلاڑی ڈریسنگ روم چلے گئے لیکن شائقین گراؤنڈز سے کی بورڈ پر آبیٹھے ہیں۔
پاکستان اور بھارت کی آن لائن سروسز ایپس کریم اور زوماٹو میں لفظی نوک جھونک ہو رہی ہے، پاکستانی رائیڈرز ایپ اور بھارتی فوڈ ڈلیوری ایپ میں لفظی جنگ ایشیا کپ میں پاکستان کے ہاتھوں بھارتی ٹیم کی شکست پر شروع ہوئی۔
کریم نے بھارتی ایپ زوماٹو کو ٹیگ کرتے ہوئے ایک ٹویٹ کیا۔ ٹویٹ میں منظر کشی کی گئی کہ کہ پاکستان سے شکست کے بعد وہاں گھروں سے رونے کی آوازیں آ رہی تھیں۔ اس میں فلمی منظر دکھایا گیا تھا جس میں پاریش راول کہتے ہیں کہ انہوں نے تو آرڈر کرنے کیلئے فون کیا تھا مگر آگے سے تو رونے کی آوازیں آ رہی ہیں۔
بھارتی فوڈ ڈلیوری ایپ نے کریم ایپ کی جانب سے میم میں بھارتی فلم کا منظر لگانے پر تنقید کرتے ہوئے جواب میں کہا کہ میم ٹمپلیٹ تو اپنی استعمال کرو۔
کریم کی جانب سے گزشتہ روز پاکستان کی افغانستان کے خلاف جیت پر زوماٹو کی گزشتہ ٹویٹ پر جواب دیتے ہوئے کہا گیا ہے کہ اپنی ٹمپلیٹ اٹھاؤ اور گھر جاؤ۔
یاد رہے کہ گزشتہ روز شارجہ کرکٹ اسٹیڈیم میں پاکستان کے ہاتھوں ہونے والی افغانستان کی شکست نے نہ صرف افغانستان کو مقابلے کی دوڑ سے باہر کیا ہے بلکہ بھارتی ٹیم کا بھی پتہ صاف ہو گیا ہے۔