اسلام آباد: وزیراعظم نے چیئرمین سینیٹ اور اسپیکر قومی اسمبلی کی تنخواہوں میں اضافے کا نوٹس لے لیا۔
ذرائع کے مطابق وزیراعظم شہباز شریف نے چیئرمین سینیٹ، ڈپٹی چیئرمین سینیٹ، اسپیکر اور ڈپٹی اسپیکر قومی اسمبلی کی تنخواہوں میں اضافے پر رپورٹ طلب کرلی ہے۔ وزیراعظم نے ہدایت کی ہے کہ چیئرمین سینیٹ اور اسپیکر قومی اسمبلی اس معاملے پر وضاحت پیش کریں تاکہ رپورٹ کی روشنی میں حتمی فیصلہ کیا جا سکے۔
یاد رہے کہ آئندہ مالی سال کے بجٹ میں سرکاری ملازمین کی تنخواہوں میں 10 فیصد اور پنشن میں 7 فیصد اضافے کا اعلان کیا گیا ہے، تاہم اسپیکر اور چیئرمین سینیٹ کی پہلے سے ہی بھاری بھرکم تنخواہوں میں مزید اضافے پر عوامی اور سیاسی حلقوں کی جانب سے شدید تنقید کی جارہی ہے۔
گزشتہ روز بجٹ کے بعد پریس کانفرنس کے دوران نمائندہ جیو نیوز کے سوال پر وزیر خزانہ نے ان اضافوں کا دفاع کرتے ہوئے کہا تھا کہ چیئرمین، اسپیکر اور ارکان پارلیمنٹ کی تنخواہوں میں 2016 کے بعد کوئی اضافہ نہیں کیا گیا۔ دوسری جانب وزیر دفاع خواجہ آصف نے سوشل میڈیا پر اپنے بیان میں ان تنخواہوں اور مراعات کو 'مالی فحاشی' قرار دیتے ہوئے شدید تنقید کی ہے۔
Last edited by a moderator:
