قومی احتساب بیورو( نیب) نے وزیراعظم شہباز شریف کے خلاف مزید 2 انکوائریاں بند کردی ہیں۔
تفصیلات کے مطابق نیب قوانین میں ترامیم کے بعد سیاستدانوں کے خلاف کرپشن کیسز سے متعلق انکوائریز اور مقدمات کے بند ہونے کا سلسلہ جاری ہے، تازہ ترین واقعہ میں نیب نے وزیراعظم شہباز شریف اور گورنر پنجاب بلیغ الرحمان کے خلاف 2 ، 2مقدمات میں انکوائریز بند کرنے کی منظوری دی ہے۔
انکوئریز بند کرنے کا فیصلہ نیب ایگزیکٹیو بورڈ کی سفارشات کی بنیاد پر کیا گیا ہے، سفارشات میں نیب ایگزیکٹیو بورڈ کا کہنا تھا کہ 3 سال کی تحقیقات کے دوران کرپشن کے حوالے سےکوئی ٹھوس ثبوت نہیں ملے، ان سفارشات پر چیئرمین نیب آفتاب سلطان نے انکوائریز بند کرنے کی منظوری دیدی ہے۔
چیئرمین نیب نے کیس کو بورڈ آف ریونیوکے سینئر ممبر کو بھجوانے کی ہدایات کردی ہیں، کیونکہ نیب قوانین میں ترمیم کے بعد سرکاری اراضی کی منتقلی سے متعلق کیسز کی تحقیقات پنجاب بورڈ آف ریونیو کو سوپنی گئی ہیں۔
واضح رہے کہ نیب نے بہاولپور میں 14 ہزار سے زائد سرکاری اراضی کی منتقلی سے متعلق معاملے پر 2019 میں تحقیقات شروع کی تھیں، اس حوالے سے نیب ملتا ن نے ماضی میں وزیراعلی پنجاب رہنے والےشہباز شریف کو طلبی کے نوٹس اور سوالنامنے ارسال کیے تھے۔