اسلام آباد کی مقامی عدالت نے وزیراعظم شہباز شریف، وزیر داخلہ محسن نقوی اور دیگر کے خلاف مقدمہ درج کرنے کی درخواست کو خارج کر دیا ہے۔ ایڈیشنل ڈسٹرکٹ اینڈ سیشن جج محمد افضل مجوکا نے محفوظ فیصلہ سناتے ہوئے درخواست کو مسترد کیا۔
یہ درخواست پی ٹی آئی کے 26 نومبر کے احتجاج اور مبینہ ہلاکتوں کے معاملے پر شہری گل خان کی جانب سے دائر کی گئی تھی۔ گل خان نے اپنے بیٹے اور دیگر افراد کی مبینہ ہلاکت پر وزیراعظم، وزیر داخلہ اور دیگر کے خلاف مقدمہ درج کرنے کی استدعا کی تھی۔
یاد رہے کہ گل خان کا بیٹا 26 نومبر کو اسلام آباد کے ڈی چوک میں مبینہ طور پر قتل ہو گیا تھا، جس کے بعد انہوں نے عدالت میں مقدمہ درج کرنے کے لیے درخواست دی تھی۔ تاہم عدالت نے اس درخواست کو ناقابلِ سماعت قرار دیتے ہوئے مسترد کر دیا۔
