پنجاب حکومت کی جانب سے اپوزیشن کو گورنر ہاؤس میں کرکٹ میچ کھیلنے کی دعوت دی گئی تاہم ن لیگ نے تحریک انصاف کے ساتھ گورنر ہاؤس پنجاب میں کرکٹ کھیلنے سے انکار کردیا۔ لیگی رہنما رانا مشہود نے کہا کہ حکومت نے عوام کا جینا دوبھر کردیا ہے اور دوسری جانب یہ کھیل کود میں مشغول ہیں۔
مسلم لیگ ن کے رہنما اور سابق وزیر رانا مشہود احمد نے کہا کہ ہم کسی صورت گورنر ہاؤس میں کرکٹ کھیلنے نہیں جائیں گے، حکومت ایک طرف ہمیں چور کہتی ہے دوسری طرف کرکٹ کھیلنے کا کہتے ہیں۔ میں نے ایک ہفتہ قبل ہی فیاض الحسن چوہان کو فون پر اس فرینڈلی میچ سے منع کردیا تھا۔
دوسری جانب فیاض الحسن چوہان نے میچ کے حوالے سے بتاتے ہوئے کہا کہ پہلے میچ کا افتتاح وزیراعلیٰ پنجاب عثمان بزدار کریں گے جبکہ فائنل میچ میں پنجاب اسمبلی کے اسپیکر پرویز الہٰی مہمانِ خصوصی ہوں گے۔
پنجاب حکومت کے ترجمان فیاض الحسن چوہان اور پاکستان پیپلز پارٹی کے علی حیدر گیلانی نے حکومت اور اپوزیشن کے کرکٹ میچ کے حوالے سے گورنر ہاؤس لاہور میں مشترکہ پریس کانفرنس کی اس دوران فیاض چوہان نے تصدیق کی کہ کرکٹ میچ کے حوالے سے رانا مشہود سے بھی رابطہ کیا ہے، لیکن انہوں نے انکار کردیا ہے حالانکہ ن لیگ کے اراکینِ اسمبلی بھی چاہتے ہیں کہ وہ بھی کرکٹ کھیلیں۔
