انصار عباسی کے مطابق نیب کے پاس عمران خان کے خون اور پیشاب کے نمونوں کی رپورٹ دستیاب ہیں، جن میں کوکین یا شراب کے استعمال کا کوئی اشارہ موجود نہیں، بیورو ذرائع نے دی نیوز کو بتایا عمران خان کی میڈیکل رپورٹ ان الزامات کی توثیق نہیں کرتی جو وزیر صحت عبدالقادر پٹیل نے چند روز قبل عائد کیے تھے۔
ذرائع کے مطابق میڈیکل رپورٹس پڑھی ہیں، الزامات کے برعکس رپورٹ کے مطابق عمران خان کی صحت کے تمام اشاریے نارمل ہیں۔ انہوں نے کہا عمران خان کے خون اور پیشاب کے نمونے اُس وقت حاصل کیے گئے تھے جب وہ نیب کی حراست میں تھے اور یہی وجہ ہے کہ ان نمونوں کی رپورٹس نیب کی پراپرٹی ہیں۔
وزیر صحت نے چند روز قبل پریس کانفرنس میں الزام عائد کیا تھا کہ عمران خان کے طبی ٹیسٹ اُس وقت کیے گئے تھے جب وہ کرپشن کے ایک کیس میں زیر حراست تھے، اور رپورٹس میں شراب اور کوکین کے استعمال کا انکشاف ہوا ہے۔
قادر پٹیل نے مزید کہا تھا رپورٹ پانچ ڈاکٹرز نے تیار کی ہے۔ انہوں نے کہا کہ ابتدائی طبی رپورٹ میں زہریلے مواد کے استعمال کا انکشاف ہوا ہے جن میں شراب اور کوکین شامل ہیں۔ قادر پٹیل نے کہا کہ حکومت عمران خان کی میڈیکل رپورٹ کو منظر عام پر لائے گی۔
انہوں نے یہ بھی دعویٰ کیا عمران خان کا ذہنی توازن ٹھیک نہیں۔ آزاد طبی ماہرین پہلے ہی عبدالقادر پٹیل کے الزامات مسترد کر چکے ہیں اور ان کا کہنا ہے کہ یہ الزامات مضحکہ خیز ہیں بلکہ بے بنیاد بھی ہیں۔ جیو کے اینکر پرسن شاہزیب خانزادہ نے گزشتہ ہفتے اپنے ایک شو میں کہا تھا کہ تین ڈاکٹروں کے ساتھ میڈیکل رپورٹ اور عبدالقادر پٹیل کی پریس کانفرنس شیئر کی گئی ہے اور تینوں نے پٹیل کے دعووں کو مضحکہ خیز اور بے بنیاد قرار دیا ہے۔
ان کا کہنا تھا کہ یورین رپورٹ عموماً چند دن بعد ہی سامنے آجاتی ہے؛ حیران کن بات ہے کہ وزیر صحت کو یہ رپورٹ سامنے لانے میں 17دن لگ گئے جو اب تک ابتدائی ہے۔ وزیر صحت نے کہا تھا کہ ’’مفصل رپورٹ سامنے آتے ہی‘‘ پولیس کو بھیجی جائے گی۔
گزشتہ روز تحریکِ انصاف کے چیئرمین عمران خان نے وفاقی وزیرِ صحت عبدالقادر پٹیل کو 10ارب روپے کے ہرجانے کا نوٹس بھجوا دیا۔نوٹس کے متن میں کہا گیا ہے کہ عبدالقادر پٹیل 15روز میں اپنے الزامات واپس لیں۔فوری طور پر چیئرمین پی ٹی آئی سے غیر مشروط معافی مانگیں۔عمران خان کے بھیجے گئے نوٹس میں مطالبہ کیا گیا کہ عبدالقادر پٹیل 10ارب روپے بطور ہرجانہ ادا کریں، جسے شوکت خانم اسپتال میں جمع کروایا جائے گا۔
