پاکستان تحریک انصاف کے رہنما حماد اظہر کہتے ہیں کہ معاشی ماہرین کے مطابق ہم ٹیکنیکل طور پر ڈیفالٹ کرچکے ہیں،زمان پارک لاہور میں عمران خان کی زیر صدارت معاشی ٹیم کے اجلاس کے بعد حماد اظہر نے کہا ملک کو مزید معاشی عدم استحکام کی طرف نہ لے جایا جائے،معاشی طور پر ملک نازک ترین موڑ پر پہنچ چکا ہے، پہلے ایک وزیر خزانہ آیا وہ اپنی منطق پر چلتا رہا۔
حماد اظہر نے مزید کہا وزیر خزانہ کہتا تھا کہ ڈالر 200 روپے سے نیچے لے آؤں گا لیکن حالت یہ ہے کہ ایل سیز کھولنے کے لیے ڈالر دستیاب نہیں،معاشی ماہرین کے مطابق ہم ٹیکنیکل طور پر ڈیفالٹ کرچکے ہیں جب کہ الیکشن کے بغیرمعاشی اور سیاسی استحکام نہیں آئے گا۔
ترجمان پنجاب حکومت مسرت جمشید چیمہ کہتی ہیں کہ وزیراعظم اور وزرا عوام کو گھڑی کے بجائے اپنی کارکردگی کا ثبوت دکھاتے تو اچھا تھا، افسوس ان کی نکمی معاشی فوج کے بیرونی دورے کسی کام نہیں آرہے،حکومت فوری الیکشن کا اعلان کرے،ورنہ ہم پنجاب اور پختونخواہ میں الیکشن کرادیں گے۔
مشیر داخلہ پنجاب عمر سرفراز چیمہ نے کہا شہباز زرداری حکومت نے ملک کو کنگال کردیا، وفاقی حکومت پیٹرول کی اضافی قیمت سے عوام کو دونوں ہاتھوں سے لوٹ رہی ہے،عالمی منڈی میں پیٹرول سستا ہے لیکن ریلیف دینے کے بجائے عوام کی جیبوں پر ڈاکہ ڈالا جا رہا ہے،جب منی لانڈرنگ کے ماہر لوگ اقتدار پر قابض ہوں تو ڈالروں کی اسمگلنگ کیسے روکی جائے گی۔
