مبینہ طور پر سیکیورٹی فورسز کی تحویل میں موجود شیخ رشید کا انٹرویو ریکارڈ ہونے کی اطلاعات
عوامی مسلم لیگ کے سربراہ اور پاکستان تحریک انصاف کے اتحادی شیخ رشید کا ٹی وی انٹرویو ریکارڈ ہونے کی اطلاعات گردش کرنے لگی ہیں، صحافیوں نے تصدیق بھی کردی۔
تفصیلات کے مطابق پاکستان تحریک انصاف کے سینئر رہنماؤں کا پہلے لاپتہ ہونے پھر اچانک منظر عام پر آکر پریس کانفرنس یا ٹی وی انٹرویو کا نا تھمنے والا سلسلہ جاری ہے،
تازہ ترین خبر عوامی مسلم لیگ کے سربراہ اور پی ٹی آئی کے حامی شیخ رشید سے متعلق آرہی ہے کہ ان کا انٹرویو بھی ریکارڈ کرلیا گیا ہے جو کل شام نجی ٹی وی چینل پر نشر کیا جائے گا۔
یہ اطلاعات صحافتی برادری کی جانب سے ٹویٹر پر شیئر کی جارہی ہیں ، سینئر صحافی علی مصطفیٰ نے کہا کہ سماء ٹی وی کے ذرائع کے مطابق لاپتہ سینئر سیاستدان شیخ رشید کو بھی سماء ٹی وی کے ایک پروگرام میں اینکر منیب فاروق کو عمران خان کے خلاف انٹرویو دینے پر مجبور کردیا گیا ہے۔
احمد وڑائچ نے لکھا کہ اطلاعات ہیں کہ سینئر اینکر منیب فاروق نے عوامی مسلم لیگ کے سربراہ شیخ رشید کا انٹرویو ریکارڈ کرلیا ہے، اس انٹرویو کا کل شام 8 بجے سماء ٹی وی پر نشر کیے جانے کا امکان ہے، لاہور ہائی کورٹ نے آج ہی پنجاب پولیس کو شیخ رشید کی بازیابی کیلئے ایک ہفتے کا وقت دیا تھا۔
صحافی رائے ثاقب کھرل نے شیخ رشید کے انٹرویو کی خبروں کی تصدیق کرتے ہوئے کہا کہ شیخ رشید کے انٹرویو کی بھی آمد آمد ہے۔
صحافی فیض محمود نے کہا کہ اب تو اصلی اور نسلی بھی اصلی و نسلی نہیں رہے۔