لکی مروت میں پولیس اہلکاروں کی ٹارگٹ کلنگ کے خلاف پولیس کا احتجاج تیسرے روز میں داخل ہوگیا ہے، مطالبات منظور نا کیے جانے پر پولیس اہلکاروں نے پولیو ڈیوٹی کے بائیکاٹ کا بھی اعلان کردیا ہے۔
تفصیلات کے مطابق لکی مروت میں پولیس اہلکاروں کا احتجاج تیسرے روز میں داخل ہوگیا ہے، مظاہرین نے درہ پیزو اور منجیوالہ چوک میں بھی دھرنا دیدیا ہے جس سے شہروں کو آپس میں ملانے والی رابطہ سڑکیں بند ہوگئی ہیں۔
مظاہرین کا مطالبہ ہے کہ پولیس کو مکمل طور پر اختیار دیا جائے، خفیہ اداروں کے اہلکاروں کو پولیس لائن سے باہر بھیجا جائےاور پولیس کے جوانوں و افسران کو مکمل تحفظ دیا جائے، پولیس خود ہی تین ماہ کے اندر دہشت گردی کا خاتمہ کردے گی۔
خیال رہے کہ خیبر پختونخوا میں پولیس پر مسلسل حملوں کے خلاف پولیس اہلکاروں نے لکی مروت میں 3 روز سے دھرنا دے رکھا تھا، پولیس مظاہرین کی بڑی تعداد دھرنے میں شریک تھی جس کی وجہ سے تاجہ زئی کے مقام پر انڈس ہائی وے ٹریفک کیلئے بند ہوگئی تھی۔
مظاہرین نے گزشتہ روز اپنے مطالبات سامنے رکھتے ہوئے کہا تھا کہ مظاہرے میں ڈیرہ اسماعیل خان، ٹانک، بنوں اور ضلع کرک کی پولیس بھی شامل ہوجائے گی۔
