پولیس نے ڈیفنس کے علاقے میں کم سن ملازم کے قتل کے مرکزی ملزم کو گرفتار کرکے اس سے مقتول کی کم سن بہن کو بھی بازیاب کرالیا، بچوں کا والد عرفان اس سفاک ملزم کا مرید ہے۔
مالکان کے تشدد سے کم سن ملازم کے قتل کے مرکزی ملزم ابوالحسن کو بہاولپور سے گرفتار کیا گیا۔ مرکزی ملزم ابوالحسن کے قبضے سے مقتول کی کم سن بہن منیبہ کو بھی بازیاب کرالیا گیا۔
پولیس کے مطابق بچوں کا والد عرفان ملزم کا مرید ہے۔ ڈی آئی جی انویسٹی گیشن کامران عادل نے بتایا کہ ملزم کے دو ساتھیوں رکشہ ڈرائیور احمد اور نوید کو بھی گرفتار کر لیا گیا ہے، واقعے کی تمام پہلوؤں سے تحقیقات جاری، جلد تمام حقائق سے آگاہ کیا جائے گا۔
انہوں نے کہا کہ لاہور پولیس ایسے واقعات میں زیروٹالرنس پالیسی پر عمل پیرا ہے، ذاتی نگرانی میں اس کیس کی تفتیش کرکے ملزمان کو قرارواقعی سزا دلوائی جائے گی۔
یاد رہے کہ وزیراعظم شہبازشریف، وزیراعلیٰ پنجاب حمزہ شہباز اور آئی جی پنجاب نے واقعے کا نوٹس لیا تھا۔
وزیراعظم نے لاہور پولیس کو تمام ملزمان کی گرفتاری کا ٹاسک دیا تھا۔ پولیس نے اسی دن مقدمہ درج کر لیا تھا۔ مرکزی ملزم ابوالحسن سمیت تمام ملزمان کی گرفتاری عمل میں آگئی ہے۔
