اللہ سبحانہ و تعالیٰ نے ایسی لیڈرشپ کے حوالے کیا جہاں اخلاقی معیار پستیوں کی گہرائیوں کو چھو رہے ہیں! : سینئر صحافی
الیکشن کمیشن آف پاکستان کی طرف سے انتخابات ملتوی کیے جانے کے فیصلے پر حکومت کا موقف ہے کہ الیکشن کمیشن نے اس فیصلے سے ملک کو بڑے آئینی بحران سے بچایا ہے، ملک سیاسی استحکام کی طرف بڑھے گا۔
الیکشن کمیشن نے معاشی، سیاسی اور سکیورٹی صورتحال دیکھ کر یہ فیصلہ کیاہے جو پاکستان کے مفاد میں ہے۔ الیکشن کمیشن نے غیر جانبدارانہ ، شفاف اور منصفانہ انتخابات کرانے ہیں۔
الیکشن کمیشن کے فیصلے کو حکومت کی طرف سے خوش آئند قرار دینے پر سینئر صحافی وتجزیہ کار کامران خان نے مسلم لیگ ن کے قائدین کے پرانے بیانات ٹویٹر اکائونٹ سے شیئر کرتے ہوئے انہیں آئینہ دکھایا اور لکھا کہ: توبہ توبہ توبہ یقیناًمن حیث لقوم ہمارے اعمال ایسے ہوں گے، اللہ سبحانہ و تعالیٰ نے ایسی لیڈرشپ کے حوالے کیا۔
جہاں اخلاقی معیار پستیوں کی گہرائیوں کو چھو رہے ہیں! پلک جھپکتے رنگ بدلتے ہیں، چلیں عوام کو منہ دکھانے کی پرواہ نہیں مگر راتوں رات پینترے بدلنے کی کہیں تو قیمت دینی ہوگی!
چیف آرگنائزر ونائب صدر مسلم لیگ ن مریم نوازشریف کا کہنا تھا کہ انتخابات کی تاریخ لینا بہت آسان ہے، پنجاب اور خیبرپختونخوا کی اسمبلیاں تحلیل کر دیں تو انتخابات کروا دیتے ہیں۔
وفاقی وزیر ورہنما مسلم لیگ (ن) احسن اقبال کا کہنا تھا کہ اگر آپ واقعی انتخابات جلدی کروانے میں سنجیدہ ہیں تو آئیں پنجاب اور خیبرپختونخوا کی اسمبلیاں تحلیل کرنے کی ایڈوائس گورنر کو بھیج دیں ہم اسے ویلکم کریں گے!
وزیر داخلہ رانا ثناء اللہ کا کہنا تھا کہ میرے قائد میاں محمد نوازشریف آج بھی اس بات پر قائم ہیں کہ ہمیں انتخابات کی طرف جانا چاہیے۔
قومی اسمبلی میں جنہوں نے استعفے دیئے ہیں وہ آن دی فلور آ کر کہہ دیں کہ ہم نے استعفے دے دیئے ہیں تو اسی وقت استعفے قبول ہو جائیں گے۔ عمران خان پنجاب اور خیبرپختونخوا کی اسمبلیاں تحلیل کر دیں تو ضمنی انتخابات نہیں عام انتخابات ہوں گے۔
وزیر پیٹرولیم مصدق ملک کا انتخابات کے حوالے سے بیان تھا کہ پنجاب اور خیبرپختونخوا کی اسمبلیاں عمران خان کے پاس ہے، وہ تحلیل کر دی جائیں تو ہم خود بخود انتخابات کی طرف چلے جائیں گے۔ مسلم لیگ ن کے مرکزی رہنما میاں جاوید لطیف انتخابات بارے کہتے تھے کہ پنجاب اور خیبرپختونخوا میں عمران خان کی حکومت ہے، دونوں اسمبلیوں کو صبح تحلیل کر دیں تو فوری انتخابات کی طرف جانے کیلئے تیار ہیں۔
