عمران خان کی اپیل اور مالیاتی اداروں کا تعاون

[Doctor sb]

عمران خان کی اپیل اور مالیاتی اداروں کا تعاون
---------------------------------------------------------
چند روز قبل وزیراعظم عمران خان نے اپنی اپیل میں اقوام متحدہ اور مقتدر عالمی راہنماؤں کی توجہ ترقی پذیر ممالک کی معاشی زبوں حالی کی جانب مبذول کروائی- قرضوں کے انبار میں دبی معیشتوں کا المیہ بیان کیا اور اپنی محدودات سے آگاہ بھی- ساتھ میں تجویز کیا کہ امیرممالک ایک جامع پروگرام تشکیل دیں تاکہ ترقی پذیر ممالک اس دلدلی کیفیت سے باہر نکل سکیں

ان کا یہ مطالبہ بروقت، منطقی، اور حالات کے عین مطابق ہے- مقروض معیشتوں پر وباء کا بےانتہا دباؤ ہے- کاروباری سرگرمیاں بند جبکہ ترقیاتی بجٹ کا کثیرحصہ محض وباء کے اثرات سے نمٹنے میں صرف ہو رہا ہے- ایسے میں اگر لاک ڈاؤن نے مزید طول کھینچا تو معشیت کی جہاں بربادی یقینی ہے وہیں سماجی افراتفری اور بدامنی بھی خارج از امکاں نہیں- جہاں تک عالمی ساہو کاروں کے قرضوں پر سود کی ادائیگی کا تعلق ہے، تو موجود حالات میں یہ امکانات مخدوش ترین ہیں

خیر، اپیل کی گونج جب دیگر ریاستوں تک پہنچی تو افریقہ سے کئی اور صدائیں بھی ہمراہ ہوئیں- عالمی بنک اور فنڈ نے ردعمل میں مزید نئے قرضوں کی فراہمی اور پرانے ری-شیڈول کرنے کی یقین دہانی کروائی- اسی مد میں پاکستان کو 1 ارب ڈالر سے زائد رقم آئی ایم ایف سے موصول ہوگی

مگر کیا عمران خان کی یہ اپیل اپنی نوعیت میں منفرد اور جداگانہ تھی

نہیں! اقوام عالم پر جنگیں اور وبائیں پہلے بھی گزر چکیں- معیشتیں ماضی میں بیسیوں بار کساد بازاری اور گراوٹ کا شکار رہی ہیں- جدید تاریخ میں متاثرہ ممالک کو اپنے پاؤں پر دوبارہ کھڑا کرنے کے لیے بڑی ریاستیں اور کثیرالاقوامی ادارے اپنا کردار ادا کرتے رہے ہیں

اس کی ایک واضح مثال جنگ عظیم دوم کے بعد یورپی ممالک کی ہے جب باہمی جنگوں میں تباہ حال معیشتوں کو سہارا دینے کے لیے امریکہ نے امدادی پروگرام بعنوان مارشل پلان متعارف کروایا- جنگ کے خاتمہ پر سرکردہ یورپی ممالک افراط زر، بے روزگاری، اور قرضوں کے بوجھ تلے دبے ہوۓ تھے- سرمایہ دارانہ نظام کے سرخیل امریکہ کو خدشہ تھا کہ اگر ان ممالک کی بروقت امداد نہ کی گئی تو کہیں یہ ممالک کمیونسٹ بلاک کا رخ نہ کر لیں- ڈوبتے کو تنکے کا سہارا کے مصداق ان مملکتوں کے لیے جمہوریت ایسی ترجیحات ثانوی تھیں

وقت کے تقاضوں کو سمجھتے اور مستقبل کی پیش بندی کے مدنظر امریکہ نے وسائل کا رخ موڑا اور تب 12 ارب ڈالر ان برباد معیشتوں کی بحالی کے لیے وقف کیے- جو اشیاۓ خوردونوش کی پیداوار اور صنعت کا پہیہ چلانے میں ممدومعاون ثابت ہوۓ- یاد رہے کہ عالمی بنک اور آئی ایم ایف کی بنیاد اس وقت نئی نئی رکھی گئی تھی اور دیگر مالیاتی اداروں کا وجود بھی نہ تھا جو خلا کو پر کرسکتا

اس وباء میں امریکہ اور اس کی سرپرستی میں دیگر مالیاتی ادارے کیوں امداد کریں گے؟ آخر خدشات کیا ہیں؟

سنہ 40 کی دہائی میں اگر امریکہ کو خدشہ تھا کہ جنگ سے تباہ حال یورپ کا رجحان کمیونزم کی جانب بڑھے گا تو اب اس کی جگہ چین نے لے لی ہے- جس کے پاس سرمایہ بھی ہے اور مستقبل کا منصوبہ بھی- پاکستان اور افریقہ کے کئی ممالک پہلے ہی سے چین کے دست نگر ہیں- " ون - روڈ، ون - بیلٹ" کے منصوبوں کے علاؤہ ان ممالک میں چین کی بڑی سرمایہ کاری ہے- لہذا اگر امریکہ ان ممالک کی امداد کو نہ آیا تو چین سبقت لے لے گا- یہ سیاسی وتزویراتی خلا ہے جسے کسی نہ کسی نے پر کرنا ہے

وباء کے مابعد اثرات میں امریکہ وچین کی مسابقتی جنگ --- مارکیٹ شئیر کی جنگ ہے- جو سنسنی خیز بھی ہے اور تناؤ سے بھرپور بھی

اب دیکھیے کہ بڑی طاقتوں کے مابین عالمی کشمکش میں چھوٹے ممالک کیسے فائدہ مند رہتے ہیں​