سینئر تجزیہ کار عارف حمید بھٹی نے انکشاف کیا ہے کہ عمران خان کو انتخابات میں ہروانے کیلئے ایک خصوصی الیکشن سیل قائم کردیا گیا ہے جس میں دھاندلی کے ماہر لوگوں کو شامل کیا گیا ہے۔
خبررساں ادارےجی این این کے پروگرام"خبرہے" میں خصوصی گفتگو کرتے ہوئےسینئر تجزیہ کار نے کہا کہ اقتدار کیلئے یہ لوگ اس حد تک گر چکے ہیں، چند لوگوں کے علاوہ بیوروکریسی نے اس ملک کو تباہ کردیا ہے، میں جانتا ہوں کس نے کیا کیا اور کس نے کہاں کتنا مال چھپا کررکھا ہوا ہے۔
انہوں نے مزید کہا کہ گزشتہ چند روز میں ہونےوالے تقرر و تبادلے دیکھ رہا ہوں، کون سا افسر کس کا کارخاص رہا، کس کے گھر ملاقات کیلئے جاتا تھا،میرا عمران خان کو مشورہ ہے کہ وہ الیکشن کا مطالبہ نا کریں بلکہ صاف و شفاف انتخابات کا مطالبہ کریں کیونکہ پی ٹی آئی کو ہروانے کیلئے چار الیکشن سیل صرف لاہورمیں قائم کردیئے گئےہیں،اس میں دھاندلی کے پی ایچ ڈی لوگوں کو شامل کیا جارہا ہے۔
سینئر تجزیہ کار نے کہا کہ اس وقت جو ساری محفل سجائی جارہی ہے وہ عمران خان کا تکنیکی طور پر ناک آؤٹ کرنے کیلئے ہے، پیپلزپارٹی اور ن لیگ کی آپس میں کوئی محبت نہیں ہے بس یہ ایک عمران خان کو سائیڈ پر کرنے کیلئےساتھ ہیں، عمران خان پورے ملک کی سیاست کا محور بن گیا ہے اور وجہ کیا ہے صرف یہ کہ عمران خان نے 2 اپریل کو این آر او نہیں دیا،اس نے امریکہ کو "ایبسولوٹلی ناٹ" کہا، اس نے کہا کہ ملک کی خارجہ پالیسی میں بناؤں گا، اس نے کہا کہ گریڈ 22 کے افسر ملک کیسے چلاسکتے ہیں۔
عارف حمید بھٹی نے کہا کہ پنجاب میں نگراں کابینہ میں جو بھی لوگ شامل ہوں گے فیصلہ کوئی اور کرے گا، چہرے کسی اور کے ہوں گے مگر احکامات دینے والا کوئی اور ہوگا، بدقسمتی ہے جنہیں جیلوں میں ہونا چاہیے انہیں ہم نے ملک سونپ دیا ہے۔
