مسلم لیگ ن کی نائب صدر مریم نواز شریف نے پاکستانی وفد کے دورہ اسرائیل سے متعلق خبروں پر سخت ردعمل دیتے ہوئے عمران خان کو شدید تنقید کا نشانہ بنا ڈالا ہے۔
تفصیلات کے مطابق ن لیگی رہنما مریم نوازشریف نے ٹویٹر پر عمران خان کی حکومت کے دوران اسرائیل کے ساتھ مبینہ طور پر تعلقات استوار کرنے سے متعلق خبروں اور افواہوں کے تراشے شیئر کیے اور ان کی سابقہ اہلیہ جمائما گولڈ اسمتھ کے بھائی زیک گولڈ اسمتھ کی انتخابی مہم چلانے پر تنقید کی۔
مریم نواز نے کہا کہ جھوٹے خط،جھوٹی عالمی سازش، قتل کا جھوٹا ڈرامہ فیل ہونے اور تاریخ کے سب سے ناکام لانگ مارچ کے بعد اب اسرائیل وفد بھیجنے کی انتشار خان کی ایک اور دونمبری سامنے آگئی ہے۔
انہوں نے مزید کہا کہ عمران خان پورے پاکستان میں واحد شخص ہیں جن کا اسرائیل کے ساتھ براہ راست خاندانی واسطہ ہے۔
مریم نواز نے کہا کہ ایک مسلمان پاکستانی کے مقابلے میں زیک گولڈ اسمتھ کی الیکشن کمپین کرنے والے عمران خان میں تمہیں وارننگ دیتی ہوں جھوٹ بولنے سے باز آجاؤ ورنہ تہمیں منہ چھپانے کی کہیں جگہ نہیں ملے گی۔
واضح رہے کے میڈیا میں پاکستانی وفد کے دورہ اسرائیل کی تصدیق اسرائیلی صدر اسحاک ہرزوگ نے بھی کردی ہے اورکہا کہ گزشتہ ہفتے ہونے والی 2 وفود سے ملاقاتوں میں امریکہ میں مقیم 2 پاکستانی بھی شامل تھے، پاکستانی وفد سے میری ملاقات خوش آئند رہی۔