farazah82
Councller (250+ posts)
پاکستان تحریک انصاف کے چئیرمین عمران خان نے تحریک طالبان پاکستان کو تجویز دی ہے کہ وہ پاکستان کے اندر اپنا رابطہ آفس کھولیں-ظاہر یہ رابطہ آفس کسی اور صوبے میں تو کھل نہیں سکے گا مگر اس طرح کے آفس کھولنے کے لیے خیبرپختون خوا کے دارالحکومت پشاور میں چیف منسٹر سیکرٹریٹ سے زیادہ مناسب کوئی جگہ نہیں ہوگی-اور کیسا رہے گا جب تحریک طالبان پاکستان کے ترجمان شاہد اللہ شاہد اس دفتر میں براجمان ہوں گے-ویسے کتنا عجیب اتفاق ہے کہ مسلم لیگ نواز کے ترجمان اور تحریک طالبان پاکستان کے ترجمان کے ناموں میں صرف “م”کا فرق ہے-ایک مشاہد ہے تو دوسرا شاہد ہے
-
عمران خان جوکہ پاکستان میں تبدیلی کا سونامی لانے چلے تھے-اور ان کے سونامی کا تذکرہ “مینار پاکستان “ہونے والے جلسے کے بعد میڈیا پر بہت سنائی دے رہا تھا-سچی بات یہ ہے کہ ایک مرتبہ تو میں نے بھی پاکستان تحریک انصاف میں پروفیشنل مڈل کلاس کی شمولیت کے بعد ایک تعریفی کالم لکھ مارا تھا اور اس کی بنیادی وجہ پاکستان تحریک انصاف میں جانے والے بائیں بازو اور پی پی پی سے تعلق رکھنے والے وہ سیاسی دانشور اور کارکن تھے جو یہ کہتے تھے کہ بہت جلد ہ عمران خان کو بائیں جانب جھکا لیں گے-عمران خان بھی کمال کا سیاست دان نکلا جو بائیں بازو کی روائت سے آنے والے کارکنوں کو ساتھ لیکر شہروں اور دیہاتوں میں شہری اور دیہی غریبوں میں بھٹو کی نقالی کرنے لگا-اس کی ایک تقریر سنکر تو تھوڑا میں بھی متاثر ہوا-لیکن مجھے عمران خان کی پارٹی کے اندر ہونے والے انتخابات اور اس کے بعد عمران خان کی پارٹی میں اعجاز چودھری،محمود الرشید ،جاوید ہاشمی اور شاہ محمود قریشی کے آگے آنے اور خبیر پختون خوا میں شباب ملی و جماعت اسلامی کے پرانے وابستگان کے چھا جانے سے یہ یقین ہوگیا تھا کہ ہمارے بائیں بازو کے دوستوں کے دعوے درست نہیں ہیں
-
اس کے بعد جب میں نے پنجاب،کراچی،خیبر پختون خوا اور بلوچستان کے اندر پی ٹی آئی کے ساتھ جانے والی پروفیشنل مڈل کلاس کے غالب رجحان کا جائزہ لیا تو وہ تو بہت واضح طریقے سے دائیں جانب کا رجحان تھا-یہ وہ پرت ہے جو تحریک طالبان اور القائدہ کے حوالے سے نرم گوشہ رکھنے اور مسلم سماج کے اندر مذھبی فسطائیت کے جراثیم اپنے اندر رکھتی ہے-اور یہ بظاہر لبرل نظر آنے والی پرت وہ ہے جو طالبنائزیشن کے لیے سماج میں جگہ پیدا کرنے کے لیے بے تاب ہے-یہ خیال اس وقت کچے اور خام انداز میں میرے ذھن میں تھا-پوری طرح سے مشہود نہیں ہوا تھا-یہ پوری طرح سے مشہود ہونا اس وقت شروع ہوا جب عمران خان نے “آل پارٹیز کانفرنس”بارے اپنے خیالات بیان کرنے شروع کئے-اور انہوں نے “دھشت گردی”بارے اپنے خیالات کو مربوط طریقے سے بیان کرنا شروع کردیا
-
عمران خان کے بیانات کا اگر تجزیہ ان کو اکٹھا کرکے شروع کیا جائے تو اس کا خلاصہ یوں بیان ہوسکتا ہے-
“دھشت گردی کے خلاف جنگ امریکی جنگ ہے-یہ پاکستان کی جنگ نہیں ہے-پاکستان کی جانب سے اس جنگ میں شرکت اور فوجی آپریشنوں نے تحریک طالبان پاکستان کو جنم دیا-ڈرون حملوں کی وجہ سے پاکستان میں دھشت گردی ہورہی ہے-تحریک انصاف کے ممبران اسمبلی کے قتل کی وجہ بھی اور چرچ پر حملہ بھی،میجرجنرل ثناء اللہ نیازی سمیت فوجی افسران کی شہادت بھی ڈرون حملوں کا نتیجہ ہے-
طالبان سے مذاکرات کئے بنا دھشت گردی ختم نہیں ہوسکتی-طالبان کو اپنا رابطہ آفس پاکستان میں کھولنا چاہئیے”
اگر اس خلاصے پر ایک نظر ڈال لی جائے تو سب سے پہلے سوال یہ پیدا ہوتا ہے کہ “کیا تحریک طالبان پاکستان کا جنم پاکستان کی جانب سے دھشت گردی کے خلاف جنگ میں شرکت سے ہوا؟کیا دھشت گردی کا نشانہ پاکستان اس وقت بننا شروع ہوا جب ڈرون حملے شروع ہوئے؟کیا پاکستان میں امریکہ کے افغانستان پر حملے سے پہلے دھشت گردی کا نام و نشان نہیں تھا؟افغانستان پر حملے سے پہلے پاکستان میں مذھبی اقلیتوں،بریلوی اور شیعہ کو ٹارگٹ نہیں کیا جارہا تھا؟
یہ سوال ایسے ہیں جو عمران خان کے بیانات اور ان کی جماعت کی پالیسی کی روشنی میں خود بخود ابھر کر سامنے آجاتے ہیں- پاکستان کی سیاسی تاریخ پر نظر رکھنے والے جانتے ہیں کہ جس وقت سویت یونین کی افواج کابل حکومت کی درخواست پر افغانستان میں دفاع کے لیے داخل ہوئیں تو پاکستان کی عسکری اشرافیہ نے افغانستان کے اندر حکومت مخالف چند مذھبی گروہوں کے تربیتی کیمپ افغانستان سے ملحقہ آزاد قبائلی علاقوں میں قائم کردئے تھے-اور جب امریکی بلاک اس جنگ میں شامل ہوا تو سعودی عرب سمیت پوری دنیا سے گوریلے انہی کیمپوں سے تربیت پاکر نکلے-
پاکستان کے اندر دیوبندی،وہابی مکاتب فکر کے اکثر مدارس ،ان مسالک کی ترجمان سیاسی جماعتیں اور جماعت اسلامی جہاد افغانستان کی سٹیک ہولڈر بن گئی تھیں-اور پورے پاکستان سے نوجوانوں کی بہت بڑی تعداد ان تربیتی کیمپوں میں مسلح گوریلا تربیت اور جہادی آئیڈیالوجی سے مسلح ہوکر نکلی-ان نوجوانوں کی تربیت کرنے والے اساتذہ چونکہ آل سعود کے زیر اثر تھے تو ان کے زریعے سے ان نوجوانوں کے اندر شیعہ،سواد اعظم اہل سنت اور مذھبی اقلیتوں کے خلاف زبردست نفرت موجود تھی-
پھر پاکستان کے اندر ضیاءالحق کی حمہوریت دشمنی میں پھیلائی جانے والی مذھبی جنونیت کے اثرات بھی ان نوجوانوں اور ان سے تشکیل پانے والی تنظیموں میں دیکھنے کو ملے-اور ضیاء کے دور سے لیکر بعد میں جمہوری ادوار تک اور 12 اکتوبر 1999ء کے آتے آتے پاکستان کے اندر شیعہ کی ٹارگٹ کلنگ،بریلوی علماء کا قتل اور ان کی مساجد پر زبردستی قبضوں کی مہم،احمدیوں کو ہراساں کئے جانے اور ان پر توھین رسالت کے الزام کے تحت پرچوں کا اندراج اور کرسچن آبادی کے خلاف ریاست کے مذھبی بنیادوں پر بنائے جانے والے امتیازی قوانین کے کا سہارا لیکر مقدمات اور ان پر حملے بہت واضح ہوچکے تھے-امام بارگاہوں پر حملے اور مساجد پر فائرنگ اور چرچ پر حملے بھی سب کے سامنے تھے-
لشکر طیبہ،حرکۃالانصار ،جیش محمد،لشکر جھنگوی جیسی تنظیمں پاکستان کے اندر فرقہ پرستانہ دھشت گردی میں ملوث ہوچکی تھیں-مشرف کے آنے سے پہلے 94ء میں پاکستان کے ایک مدرسے اکوڑہ خٹک اور کراچی کے جامعہ بنوریہ کے اندر تحریک طالبان کی بنیاد رکھی جاچکی تھی-اکوڑہ خٹک میں مولانا سمیع الحق اور جامعہ بنوریہ میں مفتی نظام الدین شامزئی طالبان کے فکری استاد کی حثیت سے کام کررہے تھے-یہی جامعہ بنوریہ سپاہ صحابہ پاکستان کے لیے فکری مواد بھی پیدا کررہا تھا-جبکہ وفاق المدراس کے تحت چلنے والے تمام مدارس کے اندر افغانستان کے اندر طالبان کے کابل فتح کرلینے کے بعد ایک ریڈکلائزیشن دیکھنے کو مل رہی تھی-
افغانستان میں ملاّ عمر کی حکومت نے لشکر جھنگوی،جیش محمد،حرکۃ الانصار کے لئے کنڑ اور پکتکیا میں تربیتی مراکز بناکر دئے تھے-اور اسی دور میں ان تنظیموں کے القائدہ سے بھی رابطے ہوئے-عالمی دھشت گرد نیٹ ورکوں سے پاکستان کی ان فرقہ پرست جہادی تنظیموں کے ربطے ٹھیک طریقے سے افغانستان میں طالبان کی حکومت کے دنوں میں ہوئے تھے-اور لشکر جھنگوی اور جیش محمد کی دھشت گردی کی صلاحیتوں میں اضافہ بھی انہی دنوں میں دیکھنے میں آیا تھا-یہ اسقدر طاقتور ہوئے کہ انہوں نے نواز شریف کف قافلے تک کو نشانہ بنانے کی کوشش کی تھی
-
پاکستان کے اندر بے نظیر بھٹو سمیت سیکولر ،لبرل سیاست دانوں اور سیاسی جماعتوں کو دیوار سے لگانے اور بے نظیر بھٹو کے خلاف تحریک اعتماد کو قائم بنانےکے لیے اسامہ بن لادن کی کوششوں کا اب سب کو علم ہے-اسی دوران مذھبی شدت پسندوں نے حکومت پر قبضہ کرنے کے لیے ایک فوجی کودتا کی منصوبہ بندی کی تھی جو ناکام ہوگئی-یہ وہ پس منظر ہے جس سے ہم اندازا لگاسکتے ہیں کہ دھشت گردی کا عالمی نیٹ ورک کس طرح سے پاکستان کے اندر اپنے پیر 9/11 سے ٹہلے ہی جمانے لگ گیا تھا-
اور میں اپنے پڑھنے والوں کو یاد کراتا چلوں کہ یہ میاں نواز شریف کا دور تھا جب جمعیت علمائے پاکستان کے سربراہ اور سواد اعظم اہل سنت کے روحانی پیشواء مولانا شاہ احمد نورانی نے مینار پاکستان پر “آل پاکستان سنی کانفرنس”سے خطاب کرتے ہوئے یہ کہا تھا کہ مریدکے میں جماعۃ الدعوۃ کا مرکز کشمیر میں جہاد سے زیادہ اہل سنت کے خلاف کاروائیاں کرنے کی منصوبہ بندی کررہا ہے-اور جہاد کشمیر کے نام پر اہل سنت کی اکثریت کو اقلیت میں بدلنے کی کوشش کی جارہی ہے
”
مولانا شاہ احمد نورانی سمیت علمائے اہل سنت نے ضیاء الحق اور میاں نواز شریف کی حکومتوں پر یہ الزام عائد کیا تھا کہ وہ ریاستی وسائل سے آل سعود کے مذھب کو پاکستان میں پھیلانے کی کوشش میں مصروف ہیں-مولانا شاہ احمد نورانی کے سعودیہ عرب جانے پر پابندی کا پس منظر بھی ان کا “سلفی تکفیری تصور جہاد”سے آختلاف تھا-
اس لیے یہ کہنا کہ پاکستان میں “نام نہاد جہادی آيیڈیالوجی “کے زیر اثر تحریک طالبان پاکستان کی تشکیل،دھشت گردی کا جنم اور پاکستان میں شیعہ،اہل سنت،احمدی ،ہندؤ اور مسیحی برادریوں کو دھشت گردی کا نشانہ بنانے کا سلسلہ پاکستان کی جانب سے دھشت گردی کے خلاف جنگ میں شرکت کے وقت سے شروع ہوا ایک بڑا جھوٹ ہے
-
ہاں یہ حقیقت ضرور ہے کہ پاکستان کے اندر خود کش بم دھماکوں اور ٹارگٹ کلنگ کے واقعات میڑ درندگی اور بربریت میں بدترین اضافہ یعنی اس کی محدودیت لامحدویت میں اے وقت بدلنا شوع ہوئی جب پاکستان کی ریاست نے ایک طرف تو فرقہ پرست تنظیموں پر پابندی لگانے کی کوشش کی-دوسری طرف عالمی دباؤ سے مجبور ہوکر طالبان کی حمائت سے ہاتھ کھینچ لیا-اور تیسری طرف جب افغانستان میں تحریک طالبان سمیت دھشت گرد تنظیموں کے نیٹ ورک امریکی حملے کی زد میں آئے تو یہ سب پاکستان کے بڑے شہروں اور قبائلی علاقوں کی طرف بھاگے-
پاکستان نے اس دور میں القائدہ کے بڑے بڑے ناموں کی گرفتاریاں کیں اور جبکہ کچھ طالبانیوں کو بھی امریکہ کے حوالے کیا-اگرچہ مشرف کی حکومت نے اور پاکستان کی عسکری طاقتوں نے یہ کام بھی ادھورا کیا-دھشت گردی کے خلاف لڑائی بھی اچھے اور برے دھشت گردوں کی تقسیم کرکے لڑی گئی جو اب تک جاری و ساری ہے-لیکن اس نیم دلی اور پک اینڈ چوز کی بنیادوں پر لڑی جانے والی دھشت گردی کے خلاف جنگ کے خلاف پاکستان کی انتہاپسند رجعتی طاقتوں نے سخت رد عمل ظاہر کیا-
اور ان عسکریت پسند دھشت گرد نیٹ ورکس کے اندر 15 سے 22 تنظیموں نے ملکر ایک تنظیم بنائی جسے ہم تحریک طالبان پاکستان کے نام سے جانتے ہیں-اس تحریک کو منظم کرنے اور مختلف دھشت گرد تنظیموں کو ایک نیٹ ورک میں بدلنے اور ان کے لیے مالی اور سٹرکچرل تعاون فراہم کرنے میں القائدہ کا بہت بڑا کردار تھا اور ہے-تحریک طالبان پاکستان کی مرکزی شوری میں صرف پاکستانی طالب ہی شامل نہیں بلکہ ازبک،تاجک،عرب ،چیچن اور افریقی دھشت گرد بھی شامل ہیں-اور القائدہ کا اس شوری پر کنٹرول بہت مضبوط ہے
-
امریکی صدر اوبامہ نے 23 ستمبر 2013ء کو یہ بیان دیا کہ القائدہ اب چھوٹے چھوٹے علاقائی گروپس میں بدل گئی ہے-اس بیان کی گہرائی پر غور کرنے سے صاف معلوم ہوتا ہے کہ تحریک طالبان پاکستان اصل میں جنوبی ایشیا کے اندر القائدہ کی ایکسٹینسشن ہے-اس کی تںظیم کا منشور پاکستان کو ایک ناجائز غیر اسلامی ریاست اور مذھبی اصطلاح میں “دار الحرب”قرار دیتا ہے اور اس کے خلاف اعلان جہاد کرتا ہے-اور یہاں پر افغانستان کی طرز پر اسلامی خلافت کے قیام کو اپنا نصب العین قرار دیتا ہے-اس منشور کو دیکھتے ہوئے یہ پتہ چلتا ہے کہ طالبان اس ملک کے آئین اور اس کی فیڈرل ڈیموکریٹک بنیادوں کو سرے سے مانتے ہی نہیں ہیں-اگر صورت حال ایسی ہی ہے تو پھر ان سے مذاکرات کا مطلب کیا ہے
-
پاکستان کا آئین نجی مسلح لشکروں کے قیام ،ریاست کے اداروں پر حملہ کرنے اور شہریوں کی جانوں سے کھیلنے والے گرہوں کی سرکوبی کی مانگ کرتا ہے-ایسے میں تحریک طالبان پاکستان سے بات چیت کرنے اور ان کے رابطہ آفس کی تجویز دینے کا مقصد خود آئین کی بنیادوں پر حملہ ہے
-
عمران خان پاکستان کو جناح،اقبال اور سرسید کا پاکستان بنانے اور اس ملک میں حقیقی تبدیلی کی باتیں بہت مرتبہ کرچکے ہیں-ان کو سوچنا چاہئے کہ کیا جناح کے پاکستان کا مطلب یہ تھا کہ خیبر پختون خوا میں لوکل گورنمنٹ کے الیکشن میں مخلوط انتخابات کی بجائے جداگانہ حق رائے دہی کو بنیاد بنا لیا جائے-اور غیر مسلموں کو برابر کے شہری قرار دینے کے دعوے سے انحراف کرلیا جائے
-
عمران خان جناح،اقبال اور سرسید کے خیالات سے مسلح سونامی لانے کی بجائے ایک طرف تو حکومت میں جماعت اسلامی کے ساتھ بیٹھ کر “موودویت والی سونامی “لانے جارہے ہیں اور دوسری طرف وہ حکیم اللہ محسود اور عصمت اللہ معاریہ کے خوابوں کو شرمندہ تعبیر کرنے کی راہ ہموار کرنے میں لگے ہوئے ہیں-
عمران خان کو اس ملک کے سواد اعظم اہل سنت ،شیعہ،احمدی،ہندؤ،کرسچن کمیونٹیز کے نہ تو جذبات کی کوئی پرواہ ہے اور نہ ہی ان کو ان برادریوں پر تحریک طالبان پاکستان کی جانب سے توڑے جانے والے ظلم کے پہاڑوں کا کوئی احساس ہے-
وہ دھشت گردی کے جواز تلاش کرنے میں اس قدر حماقتوں کا شکار ہوچلے ہیں کہ ان کو یہ اندازا ہی نہیں ہے کہ پاکستان کے دھشت گردی میں مارے جانے والے شہریوں کا کوئی تعلق ڈرون حملوں اور افغانستان پر حملے سے نہیں تھا-وہ تو اپنے ایم پی ایز کے قتل کو ڈرون حملوں کا منطقی نیتجہ بتلاتے رہے-وہ سونامی خان سے طالبان خان بن گئے ہیں-ان کی حکومت کی نااہلی تو لیڈی ریڈنگ ہسپتال میں سہولتوں کے فقدان اور عملے کی نااہلی سے ظاہر ہوگئی-وہ وہاں پر موجود دھشت گردی کا نشانہ بننے والے لوگوں کے ورثاء کا ردعمل دیکھنے کے باوجود طالبان کی ترجمانی پر ڈٹے ہوئے ہیں-لگتا ہے وہ بہت جلد تاریخ کی متروک شئے بننے کا فیصلہ کرچکے ہیں
http://lubpak.com/archives/284409
http://lubpak.com/archives/284409
Last edited by a moderator:
