پاکستان نے ڈاکٹر عافیہ صدیقی کو ہمدردانہ بنیادوں پر رہائی کیلئے امریکہ کو درخواست دائر کرنے کا فیصلہ کیا ہے۔
تفصیلات کے مطابق اسلام آباد ہائی کورٹ کی جانب سے ڈاکٹر عافیہ صدیقی کی رہائی کیلئے ان کی بہن ڈاکٹر فوزیہ صدیقی کی درخواست پر ہونے والی گزشتہ سماعت کا تحریری حکم نامہ جاری کردیا گیا ہے
تحریری حکم نامہ جسٹس سردار اعجاز اسحاق خان نے جاری کیا جس میں کہا گیا ہے کہ اٹارنی جنرل پاکستان نے عدالت کے روبرو پیش ہوکر یہ بتایا کہ وفاقی حکومت کو ڈاکٹر عافیہ صدیقی کی ہمدردانہ بنیادوں پر رہائی کی اپیل پر کوئی اعتراض نہیں۔
فیصلے میں کہا گیا ہے کہ اٹارنی جنرل نے بتایا ہے کہ حکومت بھی الگ سے ڈاکٹر عافیہ صدیقی کیلئے رحم کی ایک اپیل دائر کرے گی اور اقوام متحدہ کے اجلاس میں بھی امریکی حکام سے اس حوالے سے بات کی جائے گی۔
حکم نامے میں مزید کہا گیا ہے کہ ایڈیشنل اٹارنی جنرل نے دوران سماعت عدالت کو بتایا کہ امریکہ سےقیدیوں کے تبادلے کے معاہدے پر بھی بھرپور کام جاری ہے، اس معاہدے کو حتمی شکل دینے کیلئے مزید 3 ہفتوں کا وقت درکار ہے۔
