قانون نافذ کرنے والے اداروں نے صوابی سے کالعدم تنظیم ٹی ٹی پی کے چار دہشت گردوں کو گرفتار کرلیا ہے۔
تفصیلات کے مطابق آر پی او صوابی محمد علی گنڈاپور نے ڈی پی او نجم الحسین کے ہمراہ ایک پریس کانفرنس کےدوران بتایا کہ دہشت گردوں کی موجودگی کی اطلاع پر ایک مقامی مسجد سے ملحقہ مکان پر چھاپہ مارا گیا اور مسجد کے پیش امام سمیت کالعدم تنظیم ٹی ٹی پی کے چار ارکان کو گرفتار کیا گیا۔
انہوں نے مزید کہاکہ دہشت گردوں کے قبضے سے بھاری مقدار میں دھماکہ خیز مواد، جدید اسلحہ، اضافی گولیاں ، 7 عدد موبائل فونز برآمد کیے گئے، دہشت گردوں نے اسلحہ گھر کے مختلف حصوں کے علاوہ باہر کھیتوں میں بھی متعدد مقامات پر چھپا رکھا تھا جس کی نشاندہی عسکریت پسندوں نے کی۔
پولیس کے مطابق دہشت گردوں کی نشاندہی پیش امام عبدالرحمان، مہمند کے رہائشی عمران، ہنڈ گاؤں سے تعلق رکھنے والے ثاقب اور باجوڑ کے زبیر کے ناموں سے ہوئی ہے، پولیس نے کارروائی کے دوران مسجد کے پیش امام عبدالرحمان کا پاسپورٹ بھی برآمد کرلیا ہے۔
آرپی اور محمد علی گنڈا پور کے مطابق چھاپہ مقامی کونسلر اور مسجد کے پیش امام کی موجودگی میں مارا گیا، اس کارروائی سے دہشت گردوں کا مقامی نیٹ ورک توڑ دیا گیا، عنقریب جلد عسکریت پسندوں کی گرفتاری متوقع ہے، ضلع سے عسکریت پسندوں کے مکمل خاتمے کیلئے پرعزم ہیں۔
